हिमाल प्रेस 
फाइल तस्बिर।
काठमाडौँ– नेपाली कांग्रेसका प्रमुख सचेतक श्याम घिमिरेले सदनमा गालीगलौज गर्ने काम बन्द नभए प्रतिवादमा उत्रने चेतावनी दिएका छन्।
आइतबार प्रतिनिधिसभा बैठकमा सांसदहरुबीच आरोप प्रत्यारोप भएपछि घिमिरेले संसदको आकस्मिक समयको दुरुपयोग गर्दै गालीगलौज गर्ने काम भएको भन्दै यस्ता कार्य बन्द नभए प्रतिवादमा उत्रने चेतावनी दिएका हुन्।
सदनमा तल्लोस्तरको गालीलगौज गर्ने कामले संसदको मर्यादा कायम हुन नसक्ने उनले बताए। घिमिरेले संसदको मर्यादाविपरित अभिव्यक्ति दिने संसदहरुलाई बोल्नबाट बञ्चित गर्नुपर्ने उल्लेख गरे।
त्यस्तै माओवादी सांसद अमनलाल मोदीले सदनमा अमर्यादीत शब्द व्यक्त भएको भन्दै आपत्ति जनाए। उनले रास्वपा सांसद डीपी अर्याल र कांग्रेस सांसद रामहरि खतिवडाको अभिव्यक्ति गैरसंसदीय भएको भन्दै रेकर्डबाट हटाउन माग गरे।
आइतबार प्रतिनिधिसभा बैठकमा सांसद अर्याल र कांग्रेस सांसद खतिवडाबीच आरोप–प्रत्यारोप भएको थियो।
