हिमाल प्रेस 
चितवन- चितवन राष्ट्रिय निकुञ्जको गोही प्रजनन केन्द्रमा राप्ती नदी किनारबाट संकलन गरिएका गोहीका अण्डाबाट बच्चा कोरलिएका छन्। संकलन गरिएका २३२ अण्डामध्येबाट २०२ वटा बच्चा कोरलिएका हुन्।
निकुञ्जका सूचना अधिकारी अविनास थापा मगरका अनुसार संकलन गरिएका अण्डामध्ये २० वटालाई प्रयोगशालामा छुट्टै राखिएको थियो। यसबाट १९ बच्चा कोरलिएको छ। अन्य अण्डालाई प्रजनन केन्द्रमा प्राकृतिक रूपमा राखिएको थियो।
गत वैशाख १६ गते राप्ती नदी किनारमा रहेका गोहीका गुँडबाट संकलन गरी अण्डा ल्याइएको थियो। निकुञ्जले १८ गुँड पहिचान गरी तीमध्ये सात गुँडबाट अण्डा संकलन गरेर केन्द्रमा बच्चा कोरल्नका लागि ल्याएको थियो।
सातवटा गुँडमा रहेका २३२ अण्डा संकलन गरी गोही प्रजनन केन्द्रमा ल्याइएको थियो। संकलन गरेर ल्याइएका अण्डामध्ये २१२ अण्डालाई प्राकृतिक रुपमा कोरलिनका लागि छोडिएको थियो।
गत आर्थिक वर्षमा राप्ती नदीमा भेटिएका १६ गुँडमध्ये आठ गुँडका २४७ अण्डा निकालिएको थियो। प्राकृतिक रुपमा बच्चा कोरल्नका लागि छोडिँदा सर्प, चराहरु र अन्य जनावारसँगै मानवीय गतिविधिबाट हानिनोक्सानी हुने, नदीमा बाढी आउँदा बगाउने हुँदा जोखिममा रहेका गुँडबाट अण्डा संकलन गर्ने गरिन्छ।
निकुञ्जले गोही प्रजनन केन्द्र स्थापना गरेर नदी किनारका जोखिममा रहेका गुँडबाट अण्डा संकलन गरेर प्रजनन केन्द्रमा ल्याएर कोरल्ने गरिन्छ।
कोरलिएका बच्चाहरु हुर्काएर पुनः विभिन्न नदीहरुमा छोड्ने गरिएको छ। यहाँ हुर्किएका गोही नारायणी, राप्ती, कर्णालीलगायतका नदीमा छाडिँदै आएको छ । पछिल्लो समयमा राप्ती र नारायणीमा मात्रै छाड्ने गरिएको छ।
सन् १९७८ मा प्रजनन केन्द्र स्थापना भएपछि गोहीको बच्चा हुर्काएर सन् १९८१ बाट नदीमा छाड्न थालिएको हो।
