शिक्षासहित अन्य महत्त्वपूर्ण कानुन छिट्टै आउँछन् : कानुनमन्त्री चौरसिया

काठमाडौँ- कानुन, न्याय तथा संसदीय मामिलामन्त्री अजयकुमार चौरसियाले संसद्लाई पर्याप्त विधेयक (बिजनेस) दिएको दाबी गर्दै विद्यालय शिक्षासम्बन्धी विधेयक सदनमा प्रस्तुत हुने बताएका छन्।

रासससँग कुरा गर्दै उनले विद्यालय शिक्षालाई संशोधन र एकीकरण गर्न बनेको विधेयक- २०८० अहिले विषयगत समितिमा छलफलको चरणमा रहेको र यसले शिक्षकको समस्या समाधान गर्ने अपेक्षा गरिएको बताए।

सरकारले शिक्षाजस्तो महत्वपूर्ण क्षेत्रमा विधेयक अघि बढाएर संसद्लाई भरपुर बिजनेस दिएको मन्त्री चौरसियाको भनाइ छ। त्यस्तै, निजामती सेवा, प्रहरी तथा कानुन व्यवसायी परिषद्सम्बन्धी विधेयक पनि अगाडि बढाइएका छन्।

चौरसियाले सरकार संसद्लाई सक्रिय बनाउनेतर्फ कटिबद्ध रहेको भन्दै संविधान कार्यान्वयनको सिलसिलामा दुई सयभन्दा बढी कानुन निर्माण भइसकेको जानकारी दिए।

संविधान संशोधनको विषयमा उनले राजनीतिक सहमतिका आधारमा मात्रै प्रक्रिया अघि बढ्ने उल्लेख गरे। महिलाबीच प्रतिस्पर्धा हुने निर्वाचन प्रणालीसहित केही कानुन संशोधन प्रस्ताव तयारी अवस्थामा रहेको उनले बताए।