हिमाल प्रेस 
काठमाडौँ- प्रतिनिधिसभाअन्तर्गत शिक्षा, स्वास्थ्य तथा सूचना प्रविधि समिति सदस्यहरू तथा शिक्षा मन्त्रालयलाई एकीकृत अखिल नेपाल शिक्षक संगठनका अध्यक्ष शंकर अधिकारीले शिक्षण सिकाइमा संलग्न अनुदान शिक्षकको दरबन्दीमा रूपान्तरणसम्बन्धी पुरानो सम्झौता कार्यान्वयन गर्न आग्रह गरेका छन्।
अधिकारीले शिक्षा, विज्ञान तथा प्रविधि मन्त्रालयसँग भएको सम्झौताअनुसार ७५-२५ प्रतिशतको सीमित आन्तरिक प्रतिस्पर्धाका आधारमा आयोगमार्फत परीक्षा लिइने व्यवस्था रहेको स्मरण गराउँदै उक्त सम्झौतालाई तत्काल कार्यान्वयन गर्नुपर्ने बताए।
‘भ्रम नहोस्, एकीकृत अखिल नेपाल शिक्षक संगठनले यो मुद्दा छोडेको छैन र छोड्ने पनि छैन,’ उनले भने, ‘अनुदान शिक्षकहरूको हकहित सुनिश्चित गर्न हामी निरन्तर आवाज उठाउने छौं।’
संगठनले लामो समयदेखि अनुदान शिक्षकहरूको स्थायित्व र पेसागत सुरक्षाको माग गर्दै आएको उनले बताए।
