हिमाल प्रेस 
चितवन- भरतपुर मेयरकप फुटबल प्रतियोगिताको दोस्रो संस्करण सोमबार (जेठ २७ गते) देखि सुरु हुने भएको छ। भरतपुर महानगरपालिका भित्रका सामुदायिक तथा संस्थागत ७५ वटा विद्यालयको सहभागिता रहने प्रतियोगिता चारवटा खेलमैदानमा आयोजना गरिनेछ।
प्रतियोगिता चितवन जिल्ला फुटबल संघको आयोजना र भरतपुर महानगरपालिकाको प्रवर्द्धनमा सञ्चालन हुँदैछ। संघका महासचिव रामहरि ढकालका अनुसार प्रतियोगिता दुई चरणमा गरिनेछ। आगामी असार ४ गतेसम्म छनोट चरणका खेल सम्पन्न हुनेछन्।
पहिलो चरणबाट २४ वटा विद्यालय छनोट भई दोस्रो चरणमा प्रवेश गर्नेछन्। प्रतियोगिता १७ वर्षमुनिका छात्र खेलाडीहरूबीच हुनेछ र हरेक खेल ८० मिनेट लामो हुनेछ।
खेलहरू भरतपुर–७ को कृष्णपुर खेलमैदान, वडा नं १२ को रामबेल खेलमैदान, वडा नं १४ को सुन्दरबस्ती खेलमैदान र वडा नं ५ स्थित स्मल हेभेन बोर्डिङ स्कुलको मैदानमा हुनेछन्।
प्रतियोगितामा भरतपुर महानगर क्षेत्रका करिब १,४०० युवा खेलाडीको सहभागिता रहने अनुमान गरिएको छ। संघले प्रतियोगिता सञ्चालन गर्न करिब १२ लाख रुपैयाँ खर्च लाग्ने अनुमान गरेको छ।
मेयरकप फुटबल प्रतियोगिताको औपचारिक उद्घाटन समारोह आगामी असार ४ गते हुने जनाइएको छ।
