गृहमन्त्रीको निर्देशन – विपद् व्यवस्थापनका लागि चौबिसै घण्टा तयार रहनू

काठमाडौँ– गृहमन्त्री रमेश लेखकले मनसुनजन्य विपद्को पूर्वसूचना अनुसार नेपाल प्रहरी र सशस्त्र प्रहरीको सम्बन्धित युनिटलाई तत्काल परिचालन गर्न निर्देशन दिएका छन्।

सोमबार सशस्त्र प्रहरी बल नेपालद्वारा विपद् पूर्वतयारीबारे ब्रिफिङ लिँदै गृहमन्त्री लेखकले मनसुन सुरु नहुँदै तयारी अवस्थामा बस्नुपर्ने बताएका हुन्।

विपद्को व्यवस्थापन गर्ने जिम्मेवारी सशस्त्र प्रहरीलाई तोकेको भन्दै विपद् व्यवस्थापनको पूर्वतयारीमा लाग्न निर्देशन दिए।

‘मनसुनजन्य विपद्को तयारीमा आजैदेखि लाग्नुहोस्। पूर्वानुमान र पूर्वानुमान बेगर हुने विपद्का लागि तयार रहनु होला। पूर्वसूचना अनुसार जोखिम कुनकुन ठाउँमा छ भन्ने अनुमान गर्न सकिन्छ। त्यो बस्तीमा हामीले पूर्वसूचना दिनुप¥यो। मान्छेलाई उद्धार गरेर सुरक्षित ठाउँमा पु¥याउने गर्नुप¥यो,’ लेखकले भने।

विपद् जोखिम देखिएको ठाउँमा परिचालित भएर सम्भावित घटना रोक्न चनाखो हुनुपर्ने उनको भनाइ छ। यस्तै गृहमन्त्री लेखकले सशस्त्र प्रहरी बल नेपाललाई विपद् जोखिम न्युनीकरण तथा व्यवस्थापन प्राधिकरणको समन्वयमा काम गर्न सुझाव दिए।

गृहमन्त्री लेखकले राष्ट्रिय आपतकालीन कार्यसंचालन केन्द्र (एनईओसी) को एउटा शाखा राख्नुपर्ने बताए। ‘त्यसमा नेपाल प्रहरी, सशस्त्र प्रहरी र नेपाली सेनाका अधिकारी बसेर काम गर्नुप¥यो। कुनै पनि ठाउँमा विपद् आइलाग्दा आ–आफ्ना क्षेत्रलाई समन्वय गर्न सजिलो हुन्छ। यसले विपद् व्यवस्थापनमा चाँडो काम गर्न सकिन्छ,’ उनले भने।

मनसुनजन्य विपद्का खतरा देखिएको ठाउँमा राति गाडी चलाउन रोक्ने कुरालाई गम्भीरतापूर्वक लागु गर्नुपर्ने गृहमन्त्री लेखकको भनाइ थियो। यो वर्ष विगतको भन्दा बढी मनसुन हुने अनुमान गरिएको भन्दै बाढी–पहिरोले निम्त्याउने खतराको पूर्वतयारी थाल्नुपर्ने उनले बताए।

‘कुनै ठाउँबाट पनि गुनासो नआउने गरी, कुनै पनि ठाउँमा हाम्रो यो कमजोरी भयो भन्ने अवस्था आउनु भएन। चौबिसै घण्टा तयारी अवस्थामा रहनुप¥यो,’ उनले भने।

छलफलमा सशस्त्र प्रहरीले विपद्को पूर्वतयारीबारे विस्तृतमा ब्रिफिङ गरेको थियो। साथै भर्चुल माध्यमबाट सातै प्रदेशका सशस्त्र प्रहरीका बाहिनीपतिहरुले समेत आ–आफ्नो क्षेत्रको अवस्थाबारे ब्रिफिङ गरेका थिए।