हिमाल प्रेस 
काठमाडौँ- चलचित्र विकास बोर्डले पछिल्लो २५ वर्षमा धेरै कमाइ गर्ने २५ चलचित्र निर्मातालाई सम्मान गर्ने भएको छ। बोर्ड स्थापना भएको वर्ष २०५७ असार १६ देखि २०८२ जेठ मसान्तसम्म धेरै कमाइ गर्ने चलचित्र निर्मातालाई उक्त सम्मान प्रदान गर्न लागिएको बोर्डका अध्यक्ष दिनेश डिसीले जानकारी दिए।
‘बोर्डको पच्चीसौँ स्थापना दिवसको अवसर पारेर हामीले २५ चलचित्र निर्मातालाई सम्मान गर्ने छौँ। यसका लागि न्यूनतम पाँच करोडभन्दा धेरै कमाइ भएको चलचित्रका निर्माताले प्रमाण खुल्ने कागजातसहित सात दिनभित्र बोर्डमा निवेदन दिनुपर्ने छ। व्यक्तिगत लगानीबाट चलचित्र क्षेत्रलाई योगदान पुर्याएकालाई यस कार्यले हौसला मिल्ने हाम्रो विश्वास छ,’ उनले भने।
उनले निवेदनसँगै सम्बन्धित वर्षको चलचित्र निर्माण कम्पनीको लेखापरीक्षणको कागजपत्र र वितरकले निर्मातालाई भुक्तानी गरेको प्रमाण खुल्ने कागजात्र पेस गर्नुपर्ने बताए।
अध्यक्ष डिसीका अनुसार आगामी असार १६ गते उक्त सम्मान प्रदानसँगै ‘रियलटाइम बक्सअफिस’को सुरुआत, बोर्डका सेवालाई अनलाइनबाट प्रदान गर्नेलगायतका कार्य सुरुआत गरिने छ।
