अविरल वर्षाले कोशी लोकमार्ग अवरुद्ध, धनकुटाको दुई स्थानमा सवारी ठप्प

इटहरी- अविरल वर्षाले कोशी लोकमार्ग अवरुद्ध भएको छ। जसकारण धनकुटाको दुई स्थानमा सवारी ठप्प भएको छ । वर्षासँगै आएको बाढी र पहिरोका कारण धनकुटाको साँगुरीगढी गाउँपालिका–६ मा पर्ने कोशी लोकमार्गका दुई स्थानमा सडक पूर्ण रूपमा अवरुद्ध भएको प्रहरीले जनाएको छ।

जिल्ला प्रहरी कार्यालय धनकुटाका अनुसार आज (शनिवार) बिहान ५ः३५ बजेतिर फेदी नजिकैको लेउती खोलामा अचानक आएको बाढीले करिब एक सय मिटर सडक कटान गरेपछि दुवैतर्फको सवारी आवागमन पूर्ण रूपमा ठप्प भएको हो। घटना स्थलमा प्रहरी चौकी मूलघाटबाट खटिएको टोलीले स्थानीय तह र सम्बन्धित निकायसँग समन्वय गरी सडक खुलाउने प्रयास गरिरहेको जनाएको छ।

त्यसैगरी, आज बिहान ४ः४५ बजेतिर नमस्ते झरनाको छेउमा रुख लड्नुका साथै माथिबाट खसेको पहिरोले पनि सोही लोकमार्गको अर्को खण्ड पूर्ण रूपमा अवरुद्ध भएको छ। उक्त स्थानमा इलाका प्रहरी कार्यालय भेडेटारबाट प्रहरी नायब निरीक्षक रमेश प्रधानको नेतृत्वमा पाँच जना प्रहरी र नेपाली सेनाका पाँच जना गरी १० जनाको उद्धार टोली खटिएको छ।

अहिले अवरोध हटाउने कार्य तीव्र गतिमा भइरहेको प्रहरीले जनाएको छ। धनुकटाबाट तराई आउने र तराईबाट धनकुटातर्फ जाने यात्रुहरूलाई वैकल्पिक मार्ग प्रयोग गर्न अनुरोध गरिएको प्रहरीले जनाएको छ।