हिमाल प्रेस 
फाइल तस्बिर
काठमाडौँ– हिमताल फुटेर आएको बाढी र पहिरोबाट प्रभावित हुम्लाको नाम्खा गाउँपालिका –६ तिलगाउँमा राहत सामग्री पठाइएको छ।
हुम्लाका प्रमुख जिल्ला अधिकारी नारायण पाण्डेयले जिल्ला विपद् व्यवस्थापन समितिबाट चामललगायतका राहत सामग्रीहरु पठाइएको जानकारी दिए।
उनका अनुसार १० क्वीन्टल चामल, १०० लिटर तेल, दुई क्वीन्टल नुन, दुई क्वीन्टल चिनी, ३० क्वीन्टल मैदा, १ – १ क्वीन्टल भुजा, चिउरा, १० पोकेट चिया पठाइएको छ।
यस्तै आलु, सागसब्जी, साबुनदेखि औषधिहरु पठाइएको उनले बताए।
चारवटा त्रिपाल र १० बोरा सिमेन्ट पनि पठाइएको छ। ‘सिमीकोटबाट हामीले गाडीमा सामान पठाएको हो, सामान पुगिसकेको छ,’ उनले भने।
तिलगाउँमा बाढी र पहिराका कारण १८ वटा घरधुरी प्रभावित छन्। गाउँनजिक पहिरो पुग्दा बस्ती नै जोखिममा परेकाले तिलगाउँवासी खोलापारी फाँटमा बसिरहेका छन्।
बाढी र पहिरोले बिजुली बत्ती, खानेपानी, सिँचाइ, पुलपुलेसा लगायत सार्वजनिक पूर्वाधारमा क्षति भएको थियो। राष्ट्रिय विपद् जोखिम न्यूनीकरण तथा व्यवस्थापन प्राधिकरणका प्रमुख कार्यकारी अधिकृत दिनेश भट्टले राहत सामग्रीका साथै विज्ञको टोली हुम्ला पठाइएको बताए।
उनका अनुसार घटनाको अध्ययनका लागि वरिष्ठ डिभिजनल इन्जिनियर सुशील कुमार श्रेष्ठ, भूगर्भविद् शिव प्रसाद बास्तोला, मौसमविद् सौहाद्र जोशीसहित विपद् प्राधिकरणको टोली हुम्ला पठाइएको छ।
