हमासले बन्धक बनाएका २१ जनामात्रै जीवित छन् : ट्रम्प

काठमाडौँ– अमेरिकी राष्ट्रपति डोनाल्ड ट्रम्पले गाजामा हमासले नियन्त्रणमा लिएका तीन बन्धकको मृत्यु भएको र २१ जना मात्रै जीवित रहेको विश्वास गरिएको बताएका छन्।

‘आजको मितिसम्म २१ जना छन्, तीन जनाको मृत्यु भएको छ, हालसम्म २४ जना जीवित रहेको विश्वास गरिएको छ,’ ट्रम्पले हमासको नियन्त्रणमा रहेका बन्धकहरूबारे भने।

मृत्यु भएको भनिएकाहरूको पहिचान वा उनीहरूको मृत्युको बारेमा कसरी थाहा पाएकोबारे ट्रम्पले केही बताएका छैनन्। ‘त्यहाँ २१ जना छन् र धेरै मृत शरीर पनि,’ उनले भने।

२४ बन्धक मध्ये एक अमेरिकी एडन अलेक्जान्डर जीवित रहेको विश्वास गरिएको थियो। हमासले सन् २०२३ को अक्टोबर ७ मा इजरायलमाथि आक्रमण गरेपछि अन्य केही अमेरिकीको शव पनि हमासको कब्जामा रहेका छन्।

बन्धकहरूलाई पुनः प्राप्त गर्न र हमासलाई नष्ट गर्ने आफ्नो युद्ध लक्ष्यहरू पूरा गर्ने प्रयासमा इजरायलले गाजापट्टी कब्जा गर्ने र प्यालेस्टिनी क्षेत्रमा अनिर्दिष्ट समयका लागि बस्ने योजनालाई सोमबार अनुमोदन गरेपछि राष्ट्रपति ट्रम्पको टिप्पणी आएको हो।

यो कदमले त्यहाँ इजरायलको अपरेसनहरू व्यापक रूपमा विस्तार गर्नेछ र सम्भवतः कडा अन्तर्राष्ट्रिय विरोधलाई आकर्षित गर्नेछ।

अमेरिकी दूतावासले सोमबार १७ जना अमेरिकी नागरिक र कानूनी स्थायी बासिन्दाहरूलाई गाजा छोड्न मद्दत गरेको अमेरिकी विदेश मन्त्रालयले जनाएको छ।

‘हामी इजरायली र जोर्डन सरकारहरूका हाम्रा साझेदारहरूलाई धन्यवाद दिन्छौँ जसले यो प्रस्थान सम्भव बनाए,’ मन्त्रालयले भनेको छ।

विदेशमन्त्री मार्को रुबियोले सोमबार वासिङ्टनमा जोर्डनका राजा अब्दुल्लाह द्वितीयसँग भेट गरेका थिए।–रासस/एपी