बढ्यो राजस्व

बरहथवा- जिल्ला भन्सार कार्यालय सर्लाहीले चालु आर्थिक वर्षको चैतसम्म ४१ करोड बढी राजस्व संकलन गरेको छ।

आर्थिक वर्ष २०८१/८२ को चैतसम्म कुल रुपैयाँ ४१ करोड ७४ लाख ३३ हजार ४३३ राजस्व संकलन भएको प्रमुख भन्सार अधिकृत ठाकुर आचार्यले जानकारी दिए। यस आवको नौ महिनामा चार महिनामात्र भन्सार कार्यालयले लक्ष्यअनुसार राजस्व संकलन गरेको छ। पाँच महिना लक्ष्यभन्दा कम राजस्व संकलन भएको उनले बताए।

भन्सारबाट हाल संकलन भएको राजस्व लक्ष्यको ९५.०४ प्रतिशतमात्र हो। आवको सुरु महिना साउनमा लक्ष्यको १११.०८ प्रतिशत अर्थात् चार करोड ९४ लाख ४१ हजार ५५५ रुपैयाँ संकलन भएको थियो।

दोस्रो महिना भदौमा लक्ष्यको अत्यधिक कम ४३.७१ प्रतिशत अर्थात्  दुई करोड १३ लाख ७५ हजार ६३८ मात्र राजस्व संकलन भएको तथ्यांकमा उल्लेख छ ।

यस्तै असोजमा लक्ष्यको ६७.२२ प्रतिशत अर्थात्  दुई करोड ८० लाख ५३ हजार ८४५ रुपैयाँ राजस्व संकलन भएको छभने कात्तिकमा ९०.९३ प्रतिशत रुपैयाँ चार करोड १८ लाख १७ हजार ६३१, मंसिरमा १२४.३१ प्रतिशत  छ करोड ७२ लाख ४९ हजार २९४ रुपैयाँ, पुसमा अहिलेसम्मकै धेरै १२७.३७ प्रतिशत अर्थात् रुपैयाँ छ करोड ७९ लाख नौ हजार ६०१ संकलन भएको कार्यालयले जनाएको छ।

कार्यालयको तथ्यांकनुसार माघमा लक्ष्यको ११७.७५ प्रतिशत अर्थात् पाँच करोड ९३ लाख ४६ हजार ८२८ रुपैयाँपैयाँ, फागुनमा ९२.५८ प्रतिशत अर्थात् चार करोड ९३ लाख २९ हजार रुपैयाँपैयाँ र चैतमा लक्ष्यको ७१.७८ प्रतिशत अर्थात् तीन करोड ६५ लाख ७१ हजार ५१० रुपैयाँपैयाँ राजस्व संकलन भएको कार्यालयका सूचना अधिकारी एवं भन्सार अधिकृत डम्बरबहादुर बस्नेतले जानकारी दिए।

यस वर्ष तरकारी आयात गत वर्षको भन्दा कम भएकाले राजस्व संकलन लक्ष्यअनुसार हुन नसकेको उनले बताए।

यस भन्सार कार्यालयबाट प्लाइ निर्यात हुने गरेको छभने प्लाइ उद्योगका लागि आवश्यक सामग्री, थोरै मात्रामा धान, तरकारीलगायत सामान आयात हुँदै आएको छ ।