हिमाल प्रेस 
फाइल तस्बिर।
सिरहा– सिरहामा अज्ञात समूहले विद्युत ट्रान्सफर्मर चोरी भएको छ। सिरहाको नवराजपुर गाउँपालिका–२ मा रहेको विद्युतीय ट्रान्सफर्मर चोरी भएको हो।
स्थानीय रामपुजन मुखियाका अनुसार कमला सिँचाइ आयोजनाअन्तर्गत करिब चार वर्षअघि राखिएको एक करोडभन्दा बढी लागतको ५० एम्पियरको ट्रान्सफर्मर चोरी भएको हो।
विगतमा घर, पसलमा चोरी हुने गरेकामा पछिल्लो समय सिरहामा विद्युत् ट्रान्सफर्मरसमेत चोरी भएको छ। बिहीबार राति अज्ञात समूहले ट्रान्सफर्मर चोरेको जिल्ला प्रहरीका कार्यालयका सूचना अधिकारी तथा प्रहरी नायब उपरीक्षक वीरेन्द्रकुमार पासवानले जानकारी दिए।
अज्ञात समूहले ट्रान्सफर्मर तोडफोड गरी बाहिरी फलामे भाग फालेर ट्रान्सफर्मरभित्रको तामा र बिजुलीको तार चोरी गरेका हुन्। सूचना अधिकारी पासवानले घटनामा संलग्नहरूको खोजी भइरहेको बताए।
चोरीको प्रकृति हेर्दा विद्युत्सम्बन्धी तालिम प्राप्त व्यक्तिको संलग्नता भएको हुनसक्ने प्रहरीको अनुमान छ।
