हिमाल प्रेस 
बाँके- आइतबार साँझ परेको बेमौसमी वर्षाले गहुँँबालीमा क्षति पुर्याएपछि बाँकेका किसान चिन्तित भएका छन्। किसानले काटेर भित्र्याउन ठिक्क पारेको गहुँँबालीमा बेमौसमी वर्षा र हावाले भिजाएर क्षति पुर्याएको डुडुवा गाउँपालिका-५ कम्दीका किसान सूर्यलाल यादवले बताए। खेतमा लगाएको गहुँँ काटेर स्याहार्ने बेला वर्षाले भिजाएर ठूलो क्षति भएको उनको भनाइ छ।
नकाटेको ठाडो गहुँँबालीमासमेत हुरी र असिना पानीले ठूलो क्षति पुर्याएको उल्लेख गर्दै यादवले भने,‘यसपाली गहुँँ राम्रो फलेको थियो, भित्र्याउने बेलामा हुरी र बेमौसमी वर्षाले क्षति पुर्यायो।’ नेपालगञ्ज–१७ थुकैला गाउँका किसान रामसुरत बर्माले असिनापानी र हुरीले गहुँँबालीमा ठूलो क्षति पुर्याएको बताए। उनले भने,‘काटेको गहुँँ भिजाएर काम नलाग्ने भएको छ, नकाटेको धान पानी असिना पानी र हुरीले ढलाएर काम नलाग्ने बनाएको छ।’
गहुँँ पाकेर स्याहार्ने सुरसारमा रहेका यहाँका किसानलाई असिना पानी र हुरीले चिन्तित बनाएको छ। कृषि ज्ञान केन्द्र बाँकेका सूचना अधिकारी वरिष्ठ कृषि प्रसार अधिकृत अनिश श्रेष्ठले बेमौसमी वर्षाले काटेको गहुँँमा क्षति पुर्याएको बताए। ‘अचानक परेको पानीले अन्य बालीमा असर नपुगे पनि काटेको गहुँलाई क्षति पुर्याएको छ, के कति क्षति भयो भन्ने तथ्यांक संकलनमा लागेका छौँ’, उनले भने,‘बाँकेमा गहुँँ पाकेर भित्र्याउने बेला क्षति पुगेको छ।’
उनले जिल्लाभरमा के कति क्षति पुगेकोबारे आफूहरुले अनुगमन गरिरहेको र आठवटै पालिकामा रहेका कृषि शाखालाई विवरण संकलन गरेर कृषि ज्ञान केन्द्रमा पठाउन आग्रह गरिएको जानकारी दिए। बाँकेमा गत बुधबार अपरान्हदेखि रातभर हुरी र वर्षाले गहुँँ बालीमा क्षति पुर्याएकोमा आइतबार साँझ परेको वर्षाले किसानलाई गहुँँबाली भित्र्याउनमा पनि समस्या भएको सूचना अधिकारी श्रेष्ठको भनाइ छ।
नेपाल किसान महासंघ बाँकेका अध्यक्ष कृष्णविक्रम केसीले नयाँ वर्षको पूर्व सन्ध्यामा आएको बेमौसमी वर्षा र हुरीले किसानलाई दुःखी बनाएको बताए। उनले वर्षाले पाकेको गहुँँबाली, मसुरो र अरहर खेतीमासमेत क्षति पुर्याएको बताए।
