हिमाल प्रेस 
काठमाडौँ– अमेरिकाले अफगानिस्तानका लागि दिएको खाद्य सहायता कटौती गरेपछि यहाँका लाखौँ मानिस भोकमरीको गम्भीर जोखिममा परेका छन्। संयुक्त राष्ट्र अन्तर्गतको खाद्य सहायता कार्यक्रम (डब्लुएफपी) का अनुसार अहिले उनीहरूसँग सीमित स्रोत मात्र बाँकी छ, जसले गर्दा सबैलाई आवश्यक सहायता दिन असम्भव भएको छ।
डब्लुएफपीका अनुसार अफगानिस्तानमा करिब ४५ लाख मानिसलाई खाद्य सहायता आवश्यक छ। तीमध्ये ३१ लाख मानिस अकालको मुखमा छन्। अहिलेको अवस्थाअनुसार, वर्षभरि जम्मा आठ लाख मानिसलाई आधा परिमाणमा मात्र सहायता दिन सकिनेछ।
डब्लुएफपी अफगानिस्तानका प्रमुख मुइन्टा चिमुकाले भने,‘हामीसँग भएको स्रोत निकै थोरै छ। अझै सहयोग प्राप्त भएन भने, हामीले केही समुदायलाई भन्नु पर्छ कि हामी तपाईँहरूलाई सहयोग गर्न सक्दैनौँ। त्यसपछि उनीहरू कसरी बाँच्ने?’
अमेरिकी राष्ट्रपति डोनाल्ड ट्रम्पले पद सम्हालेपछि सबै विदेशी सहायता तीन महिनाका लागि रोक्ने निर्णय गरेका थिए।
आपतकालीन सहायता छुट हुने भनिए पनि अफगानिस्तानसहित १४ देशका लागि सहायता कटौती गरिएको छ। केही देशको सहायतापछि पुनः बहाल गरिएको भए पनि अफगानिस्तानमा कटौती यथावत् छ।
संयुक्त राष्ट्रका अनुसार अफगानिस्तानमा बेरोजगारी, गरिबी र अन्य देशबाट फिर्ता आएका मानिसहरूका कारण स्थिति झन् जटिल हुँदै गएको छ। खाद्यान्नको अभाव, कृषि क्षेत्रमा समस्या र पोषणको कमीले लाखौँ जनताको जीवन संकटमा परेको छ।
संयुक्त राष्ट्रले सबै दाताहरूसँग अपील गर्दै भनेको छ, ‘यदि हामीले तुरुन्त सहयोग जुटाउन सकेनौँ भने, अफगान जनतालाई भोक र पीडाबाट जोगाउन गाह्रो पर्छ। दीर्घकालीन समाधानका लागि अहिले नै कदम चाल्न जरुरी छ।’-रासस/एएफपी
