उच्च अदालतको आदेश बदर गर्न माग गर्दै रविले हाले सर्वोच्चमा निवेदन

काठमाडौँ- राष्ट्रिय स्वतन्त्र पार्टी (रास्वपा) का सभापति रवि लामिछानेले उच्च अदालत तुलसीपुरको बुटवल इजलासको आदेशविरूद्ध सर्वोच्च अदालतमा निवेदन दर्ता गराएका छन्।

उच्च अदालत बुटवलको इजलासले कारागारमा राख्न दिएको आदेशलाई चुनौती दिँदै रास्वपा सभापति लामिछानेले शुक्रबार सर्वोच्च अदालतमा निवेदन दर्ता गराएका हुन्।

२२ चैतमा उच्च अदालतको आदेश आएलगत्तै प्रहरीले उनलाई काठमाडौँको बुढानिलकण्ठस्थित घरबाट पक्राउ गरेको थियो। हाल उनी थुनुवाका रूपमा रुपन्देही कारागारमा छन्।

सहकारी ठगी प्रकरणमा लामिछानेलाई एक करोड धरौटीमा छाड्न जिल्ला अदालत रुपन्देहीको आदेश बदर गर्दै उच्च अदालतले थुनामा पठाउन आदेश दिएको थियो।

न्यायाधीशद्व रमेश ढकाल र स्वीकृति पराजुलीको संयुक्त इजलासले जिल्ला अदालत रुपन्देहीका न्यायाधीश प्रल्हादकुमार योगीको इजलासले दिएको आदेश बदर गरेर लामिछानेलाई थुनामा पठाउन आदेश दिएको थियो।

बुटवलको सुप्रिम सहकारी ठगीसम्बन्धी मुद्दामा उनी पक्राउ परेका हुन्।