हिमाल प्रेस 
काठमाडौँ– गृहमन्त्री रमेश लेखकले तीनकुने घटनाका घाइतेलाई विभिन्न अस्पताल पुगेर स्वास्थ्यावस्थाबारे जानकारी लिएका छन्। गृहमन्त्री लेखकले घाइतेहरूको उपचारको व्यवस्था सरकारले मिलाउने बताए।‘मन्त्रिपरिषद्को बैठकले पनि तीनकुने घटनाका घाइतेलाई सरकारले उपचारको व्यवस्था गर्ने निर्णय गरेको छ,’ उनले भने, ‘अस्पतालले घाइतेको उपचार निःशुल्क गरेको वा नगरेकोबारे बुझ्न आएको छु।’
उनले बिरामीका आफन्तले आफैँले खर्च गरिसकेको बिलको प्रमाणीकरण अस्पतालले गर्ने र त्यसको भुक्तानी सरकारले गर्ने जानकारी दिए।
‘अहिले बाहिरबाट औषधि किनेर खर्च गरे पनि त्यो खर्च गरेको बिल अस्पतालमार्फत स्वास्थ्य मन्त्रालयमा जान्छ र त्यसको भुक्तानी सरकारले गर्छ,’ उनले भने।
पूर्वराजाका समर्थकले यही चैत १५ गते तीनकुने क्षेत्रमा गरेको प्रदर्शनपछि भएको झडपमा दुई जनाको मृत्यु भएको थियो। घटनाका पाँच घाइते हाल उपत्यकाका विभिन्न अस्पतालमा उपचाररत छन्।
त्यसैगरी मन्त्री लेखकले धनुषाको सबैला नगरपालिकामा भएको आन्दोलनमा घाइते भएका सञ्जय यादवकोसमेत स्वास्थ्यावस्थाबारे जानकारी लिएको गृहमन्त्रीको सचिवालयले जनाएको छ। यादव राष्ट्रिय ट्रमा सेन्टरमा उपचाररत छन्।
प्रकाशित: २७ चैत २०८१ १९:४७
प्रतिक्रिया
