हिमाल प्रेस 
काठमाडौँ– स्थानीय स्वास्थ्य अधिकारीहरूका अनुसार इजरायली आक्रमणमा गाजापट्टीमा राति र आइतबारसम्म १० महिला र बालबालिकासहित कम्तीमा १५ जनाको ज्यान गएको छ।
इजरायलले हमाससँगको युद्धविरामको अन्त्य गरी गत महिना आफ्नो हवाई र भूमि युद्ध फेरि सुरु गरेको थियो। उसले लडाकुहरूलाई युद्धविराम र बन्धक मुक्तिका लागि नयाँ सम्झौता स्वीकार गर्न दबाब दिनका लागि आक्रमणको लहर र क्षेत्र कब्जा गरेको छ। साथै खाद्यान्न, इन्धन र मानवीय सहायताको आयातमा पनि रोक लगाएको छ।
नासर अस्पतालका अनुसार पछिल्लो आक्रमणले दक्षिणी सहर खान युनिसमा एउटा पाल र एउटा घरमा प्रहार गरेको थियो। उक्त हमलामा पाँच पुरुष, पाँच महिला र पाँच बालबालिकाको मृत्यु भएको छ।
सन् २०२३ अक्टोबर ७ मा हमास नेतृत्वको लडाकूहरूले इजरायलमा आक्रमण गर्दा करिब एक हजार दुई सय मानिसको मृत्यु भएको थियो र दुई सय ५१ जना बन्धक बनाइएका थिए। त्यसपछि दुवै पक्षबीच युद्ध सुरु भयो। युद्धविराम वा अन्य सम्झौताहरूमा अधिकांश बन्धकहरू रिहा भइसकेपछि अझै पनि ५९ बन्धक गाजामा राखिएका छन् – जसमध्ये २४ जना जीवित रहेको विश्वास गरिएको छ।
गाजाको स्वास्थ्य मन्त्रालयका अनुसार इजरायली आक्रमणमा कम्तीमा ५० हजार छ सय ९५ प्यालेस्टिनीको मृत्यु भएको छ। मन्त्रालयले मृतकमध्ये कति नागरिक वा लडाकूहरू थिए भनेर बताएको छैन।
इजरायली आक्रमणमा थप एक लाख १५ हजार तीन सय ३८ जना घाइते भएको मन्त्रालयले बताएको छ। इजरायलले कुनै प्रमाण नदिई करिब २० हजार लडाकू मारिएको बताएको छ।–रासस/एपी
