हिमाल प्रेस 
काठमाडौँ- इन्डियन प्रिमियर लिग (आईपीएल)मा राजस्थान रोयल्सले लगातार दोस्रो जित निकालेको छ। शनिबार भएको खेलमा राजस्थानले पन्जाब किंग्सलाई ५० रनले हराएको हो।
राजस्थानले दिएको २०६ रनको लक्ष्य पछ्याएको पन्जाबले २० ओभरमा ९ विकेट गुमाएर १५५ रन मात्र बनाउन सक्यो। पञ्जाबका लागि नेहाल वधेराले सर्वाधिक ६२ रन बनाए। ग्लेन म्याक्सवेलले ३० रन बनाए भने प्रभसिमरन सिंहले १७ रन बनाए ।
४३ रनमा ४ विकेट गुमाएको पन्जाबका लागि नेहाल र म्याक्सवेल मिलेर ८८ रनको साझेदारी गर्दै पञ्जाबलाई खेलमा फर्काएका थिए तर १५औं ओभरको अन्तिम बल र १६औं ओभरको पहिलो बलमा लगातार यी दुईको विकेट गुमेपछि पन्जाब फेरि खेलमा पछाडि परेको थियो।
राजस्थानका जोफ्रा आर्चरले ३, महीश थिक्साना र सन्दीप शर्माले २-२ विकेट लिँदा कार्तिकेया सिंह र वानिन्दु हसरंगाले १-१ विकेट लिए।
टस हारेर पहिले ब्याटिङ गरेको राजस्थानले २० ओभरमा ४ विकेट गुमाएर २०५ रन बनाएको थियो। यशश्वी जैसवालले ६७ रन बनाए भने रियान पराग ४३ रनमा अविजित रहँदा कप्तान सन्जु सामसनले ३८ रन बनाए ।
पन्जाबका लकी फर्गुसनले २ विकेट लिँदा अर्शदीप सिंह र मार्को यान्सेनले १-१ विकेट लिए।
