हिमाल प्रेस 
काठमाडौँ- नेपाल बार एसोसिएसनको नयाँ नेतृत्व चयन गर्न भएको निर्वाचनमा ८० प्रतिशत मतदान भएको छ।
एसोसिएसनको २७ औँ केन्द्रीय कार्यसमितिको शनिबार भएको निर्वाचनमा ८० प्रतिशत मतदान भएको हो। देशभर गरी कूल ९ हजार ९९७ मतदाता रहेकोमा ७ हजार ९९५ जनाले मतदान गरेको एसोसिएसनकी महासचिव अन्जिता खनालले जानकारी दिइन्।
खनालका अनुसार उपत्यकामा ४ हजार ६४३ र उपत्यकाबाहिर ३ हजार ३५२ मत खसेको छ। उपत्यकाभित्र काठमाडौँ बारमा एक हजार ३८१, उच्च बार पाटनमा एक हजार ५५८, ललितपुर बारमा ५६०, सर्वोच्च बारमा ५५० र भक्तपुर बारमा ३८८ मत खसेको छ।
प्रमुख निर्वाचन अधिकृत वरिष्ठ अधिवक्ता रामकृष्ण निरालाले दिएको जानकारीअनुसार बिहान ८ बजेदेखि सुरू भएर अपराह्न ४ बजेसम्म मतदान भएको थियो।
नयाँ नेतृत्वका लागि अध्यक्षमा बृहत् लोकतान्त्रिक, प्रगतिशील, पेसागत, राष्ट्रवादी एवं समावेशी कानुन व्यवसायी समूहबाट वरिष्ठ अधिवक्ता प्रा.डा.विजयप्रसाद मिश्र र व्यावसायिक कानुन व्यवसायी समूहबाट वरिष्ठ अधिवक्ता रमनकुमार श्रेष्ठ प्रतिस्पर्धामा छन्।
त्यस्तै महासचिवमा वरिष्ठ अधिवक्ता मिश्रको समूहबाट वरिष्ठ अधिवक्ता केदारप्रसाद कोइराला र श्रेष्ठको समूहबाट अधिवक्ता यज्ञमणि न्यौपाने उम्मेदवार छन्।
निर्वाचनमा २५ पदका लागि ५७ जनाले प्रतिस्पर्धा गरिरहेका छन्।
