केपी ओली कप टी–२० क्रिकेट सुरु, स्याङ्जा र काठमाडौंको विजयी सुरुआत

पोखरा– पोखरामा शनिबारदेखि दोस्रो संस्करणको ‘केपी ओली कप टी –२० राष्ट्रिय खुला पुरूष क्रिकेट’ प्रतियोगिता सुरु भएको छ।

मदन भण्डारी स्पोर्टस् एकेडेमीको आयोजनामा २३ देखि ३० चैतसम्म पोखरा रंगशालाको क्रिकेट मैदानमा सुरु प्रतियोगिताको सञ्चार तथा सूचना प्रविधि मन्त्री पृथ्वी सुब्बा गुरुङले उद्घाटन गरे।

प्रतियोगितामा १६ टिमले भाग लिएका छन्।

पहिलो दिन दुई खेल भए। घरेलु पोखरा महानगरपालिका र स्याङ्जा क्रिकेट क्लबबीच भएको पहिलो खेल २३ रनले हराउँदै स्याङ्जाले जित्यो।

१६२ रनको लक्ष्य दिएको पोखरालाई १३८ रनमा रोक्दै स्याङ्जाले विजयी सुरुवात गरेको हो। पोखराले २० ओभरमा ८ विकेट गुमाउँदै १३८ रनमात्रै जोड्न सक्यो।

ओपनर आशीष न्यौपाने ५ रनमै आउट भएको पोखराका लागि समित श्रेष्ठले ५३ रनको योगदान दिए पनि जितका लागि पर्याप्त रहेन। उनले ४७ बलमा ८ चौका प्रहार गरे। प्रमोद बास्तोला २७ रनमा आउट भए। उनले २० बलमा २ चौका र २ छक्का प्रहार गरे। अभिनव शाह ३, धीरज अधिकारी ९, विष्णुप्रसाद शर्मा २८, हरिशंकर १, अञ्जन केसी ४ रनमा आउट भए।

स्याङ्जाका लागि लक्ष्मण डुम्रेले ४ ओभरमा २८ रन खर्चेर सर्वाधिक ३ विकेट लिए। तुल्सीराम न्यौपानेले २ तथा मिलन लुटेल र किरण भट्टराईले १÷१ विकेट लिए।

त्यसअघि टस जितेर ब्याटिङ रोजेको स्याङ्जाले २० ओभरमा ६ विकेट गुमाउँदै १६१ रन बनाएको थियो। स्याङ्जाका लागि अस्विन रानाले अविजित रहँदै सर्वाधिक ४६ रन जोडे। उनले ३० बलमा ५ चौका र २ छक्का प्रहार गरे। किरण भट्टराई २३ रनमा अविजित रहे। उनले १२ बलमा ३ चौका र १ छक्का प्रहार गरे।

ओपनर करण पगेनी २० रनमा आउट भए। ईश्वर क्षेत्रीले १६ बलमा २ चौका र २ छक्काको मद्दतमा २४ रन बनाउँदै आउट भए। विशाल कोइराला शून्य, सुजन गौतम १४, मिलन क्षेत्री ६, सन्दिम खत्री क्षेत्री २३ रनमा आउट भए।

पोखराका लागि समीर भुजेल र अन्जन केसीले समान २÷२ विकेट लिए भने सुवाष वास्तोला र मार्सल बरालले १÷१ विकेट लिए।

दोस्रो तथा उद्घाटन खेलमा सीईसी क्रिकेट क्लब काठमाडौँ विजयी भयो। उसले हेटौँडा एसएलाई ११ रनले हराएको हो। १५२ रनको विजयी लक्ष्य पाएको हेटौँडा २० ओभरमा १४० रनमै अलआउट हुन पुग्यो। हेटौँडाका लागि शुभ कंशाकरले ५४ रनको अर्धशतकीय इनिङ खेले पनि जितका लागि पर्याप्त भएन। उनले २४ बलमा ९ चौका र २ छक्का प्रहार गरे।

ओपनर गौरभ खड्का ८ रनमै आउट भए। सुमन सुनार ३८ रनमा आउट भए। उनले ३४ बलमा ३ चौका र १ छक्का प्रहार गरे। युविन बुढाथोकी १२, अकिलेश ठाकुर १, सक्षम वस्ताकोटी १३, रामनरेश गिरी ४, विशाल फुयाल १, अशिम श्रेष्ठ शुन्य र समीर चौलागाईँ १ रनमा आउट भए।

काठमाडौँका लागि सूर्य तामाङ र युशिनविक्रम सिंह ठकुरीले समान ३ विकेट लिए। मनोज यादवले २ विकेट लिए।

टस जितेर ब्याटिङ थालेको सीईसी काठमाडौँले २० ओभरमा ३ विकेट गुमाउँदै १५१ रन बनाएको थियो। काठमाडौँका लागि पृथु बास्कोटाले अविजित ५७ रनको अर्धशतकीय पारी खेले। उनले ३३ बलमा ५ चौका र ४ छक्का प्रहार गरे। शिवम् तिवारी १८ रनमा नटआउट रहे। उनले ८ बलमा २ चौका र १ छक्का प्रहार गरे।

ओपनर सुशान्तसिंह थापा १५ रनमा आउट भए। रीत गौतम २९ रनमा र सचिन लेखक २२ रनमा आउट भए। हेटौडाका लागि समीर चौलागाईँ, सांसद अलि मन्सुरी र रामनरेश गिरीले समान १ विकेट लिए।

उद्घाटनका अवसरमा सरकारका प्रवक्तासमेत रहेका मन्त्री गुरूङले खेलकुदको माध्यमबाट गण्डकी प्रदेशलाई पर्यटनको प्रवद्र्धन गर्न सकिने बताए। उनले पर्यटनको राजधानी पोखरालाई खेलकुदको पनि हब बनाउनुपर्ने उल्लेख गर्दै गण्डकी प्रदेशमा आफ्नो नेतृत्वमा रहेको सरकारले पूर्वाधारका लागि रकम विनियोजन गरेको जनाए। उनले पोखराको क्रिकेट खेल मैदानलाई अन्तर्राष्ट्रिय स्तरको बनाउन आवश्यक रहेको बताए।

सरकारले पोखरा क्रिकेट खेल मैदानलाई स्तरवृद्धिको साथै पूर्वाधार निर्माणलाई प्राथमकितामा राखेको बताउँदै उनले अन्तर्राष्ट्रियस्तरको क्रिकेट खेल पोखरामा आयाजना गर्न सक्ने गरी पूर्वाधार निर्माण गर्न सरकारले बजेट विनियोजन गर्ने उल्लेख गरे।

राष्ट्रिय खेलकुद परिषद्का उपाध्यक्ष एवं एकेडेमीका अध्यक्ष ध्रुव आचार्यले ग्रास रुटबाटै खेलाडी उत्पादनमा सहयोग पुग्ने हिसाबले प्रतियोगितालाई निरन्तरता दिइएको बताए। उनका अनुसार पोखरामा खेल पर्यटनमा पनि यसले सघाउ पुग्नेछ।

गत वर्ष प्रदेश तथा विभागीयसहित १२ टिमले भाग लिएका थिए। जसमा मधेश प्रदेशले फाइनलमा त्रिभुवन आर्मी क्लबलाई पराजित गर्दै पहिलो उपाधि जितेको थियो। विजेताले ५ लाख र उपविजेताले साढे २ लाख प्राप्त गरेकामा यसपालि पुरस्कार राशितसमेत बढाइएको छ।

विजेताले १० लाख र उपविजेताले ५ लाख साथमा ट्रफी, मेडल तथा प्रमाणपत्र प्राप्त गर्नेछन्। म्यान अफ दि सिरिजले ३० हजार, वेस्ट बलर, बेस्ट ब्याटरले १०/१० हजार र म्यान अफ दि म्याचले ५ हजार साथमा ट्रफी प्राप्त गर्ने आयोजकले जनायो। खेल लिग कम नक आउटका आधारमा खेलाइने छ। प्रतियोगिता सम्पन्न गर्न १ करोड ३० लाख खर्च हुने एकेडेमी सचिव कृष्ण तिमिल्सिनाले बताए।