मुक्तिनाथ विकास बैंक र साउथवेस्ट्रन बिजनेस कलेजबीच सम्झौता

काठमाडौँ- मुक्तिनाथ विकास बैंक र साउथवेस्ट्रन बिजनेस कलेजबीच बैंकिङ साक्षरता र व्यवसाय आदानप्रदान गर्ने उद्देश्यले सम्झौतापत्रमा हस्ताक्षर भएको छ।

सम्झौताअनुसार बैंकले कलेजका विद्यार्थीहरूलाई बैंकिङ साक्षरता कार्यक्रम प्रदान गर्नेछ। यो कार्यक्रममार्फत विद्यार्थीहरूले आधुनिक बैंकिङ प्रणाली, वित्तीय योजना र लगानीका बारेमा ज्ञान प्राप्त गर्न सक्ने बैंकले विश्वास लिएको छ।

सम्झौता कार्यान्वयनमा आएसँगै कलेजका विद्यार्थीहरूको क्षमता विकास गर्ने, वित्तीय जागरण तथा विद्युतीय कारोबारको जोखिमबारे सचेतना बढाउने र रोजगारीको अवसरसमेत प्राप्त गर्ने बैंकले जनाएको छ।

सम्झौताले बैंक र कलेजबीच दीर्घकालीन सहकार्यको सुरूवात गरेको र यसले विद्यार्थीहरूलाई व्यावहारिक ज्ञान र रोजगारीको अवसर दिने बैंकका प्रमुख सूचना अधिकारी तिलबहादुर गुरुङले बताएका छन्।