हिमाल प्रेस 
थाइल्यान्डको औपचारिक भ्रमण तथा बैंककमा आयोजित छैटौँ बहुक्षेत्रीय प्राविधिक तथा आर्थिक सहयोगका लागि बंगालको खाडीको प्रयास (बिमस्टेक) शिखर सम्मेलन सम्पन्न गरी शनिबा स्वदेश फर्किएका प्रधानमन्त्री केपी शर्मा ओली त्रिभुवन अन्तर्राष्ट्रिय विमानस्थलको अष्टिविशिष्ट कक्षमा पत्रकारसँग कुराकानी गर्दै। तस्बिर : रासस
काठमाडौँ- प्रधानमन्त्री केपी शर्मा ओलीले आफ्नो थाइल्याण्ड भ्रमण सफल भएको बताएका छन्।
थाइल्याण्डको औपचारिक भ्रमण र बिम्स्टेक शिखर सम्मेलनमा भाग लिई स्वदेश फर्किएका उनले त्रिभुवन अन्तर्राष्ट्रिय विमानस्थलमा सञ्चारकर्मीसँग कुरा गर्दै यस्तो बताएका हुन्।
उनले भ्रमणका क्रममा भारतीय प्रधानमन्त्री नरेन्द्र मोदीलगायतसँग महत्वपूर्ण साइडलाइन छलफल भएको बताए।
प्रधानमन्त्री ओलीले भारतीय प्रधानमन्त्रीसँगको भेटमा नेपाल–भारत सम्बन्धलाई अझ व्यापक र सुदृढ गर्दै लाने र कुनै समस्या देखिए संवादमार्फत समाधान गर्ने समझदारी भएको उल्लेख गरे।
उनले भारतीय प्रधानमन्त्रीको पूर्वनिर्धारित कार्यक्रम तय भएकाले सगरमाथा संवादमा सहभागी नहुने जानकारी प्राप्त भएको बताए।
प्रधानमन्त्री ओलीले चैत १५ गते तीनकुनेमा भएको घटनाको निष्पक्ष छानबिन हुने स्पष्ट पारे। उनले शिक्षकहरूको जायज मागलाई सरकारले सम्बोधन गर्ने भन्दै सरकारमाथि विश्वास गरेर नै शिक्षकहरू प्रदर्शनमा आएको टिप्पणी गरे।
थाइल्याण्डका प्रधानमन्त्री पे थोङ थान शिनावात्राको मैत्रीपूर्ण निमन्त्रणामा २१ सदस्यीय प्रतिनिधिमण्डलको नेतृत्व गर्दै प्रधानमन्त्री ओली यही चैत १९ गते त्यसतर्फ प्रस्थान गरेका थिए। उनले चैत २२ गते बिम्स्टेक शिखर सम्मेलनलाई सम्बोधनसमेत गरेका थिए।
प्रधानमन्त्री ओलीलाई त्रिभुवन विमानस्थलको अतिविशिष्ट कक्षमा उपप्रधानमन्त्री प्रकाशमान सिंह, गृहमन्त्री रमेश लेखक, संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेलगायतले स्वागत गरेका थिए भने नेपाली सेनाको एक टुकडीले सम्मान गारत सलामी अर्पण गरेको थियो।
