हिमाल प्रेस काठमाडौँ– विद्यालय बन्द गरेर काठमाडौँ केन्द्रित आन्दोलनमा सहभागी शिक्षकहरूलाई प्रधानमन्त्री केपी शर्मा ओलीले धन्यवाद दिएका छन्। बैंककबाट फर्किएपछि त्रिभुवन विमानस्थलमा पत्रकारसँगको कुराकानीमा प्रधानमन्त्री ओलीले सरकारलाई विश्वास गरेर सडकमा आएको भन्दै शिक्षकलाई धन्यवाद दिएका हुन्।
ओलीले भने, ‘सरकारमाथि विश्वास गरेर उहाँहरू प्रदर्शनमा आउनुभएको छ। पहिलेपहिले यसरी प्रदर्शन गर्नु हुन्नथ्यो नि यसरी किनभने प्रदर्शन गर्यो गर्यो कानमा बतास लाग्दैन भने किन प्रदर्शन गर्ने भन्ने हुन्थ्यो। अहिले आवाज उठाएपछि सरकारले सम्बोधन गर्छ भन्ने उहाँहरूलाई विश्वास छ।’
प्रधानमन्त्री ओलीले शिक्षकहरूसँग चाँडै वार्ता हुने बताए। ओलीले भने, ‘हामी कुराकानी गर्छौँ, सरकारले उहाँहरूका कुरा सुन्छ पनि न उहाँहरू सरकारविरोधी हो, न सरकार उहाँहरू विरोधी हो। सबै हामी एउटै हौँ।’
उनले केकति गर्न सकिन्छ र के कस्तो गर्नुपर्छ भन्ने परस्परमा सल्लाह गरेर टुंग्याइने पनि बताए। ‘उहाँहरूले यसमा धेरै दुःख नपाए हुन्छ। सरकारले कुनै नकारात्मक दृष्टिकोण राख्दै राख्दैन किन राख्नुपर्या छ र? उहाँहरू आइहाल्नुभएको छ ठिक छ। आइरहनुपर्ने थिएन। सानै डेलिगेसन आएर भन्दा पनि हुन्थ्यो’, ओलीले भने।
संसद्को शिक्षा स्वास्थ्य तथा सूचना प्रविधि समितिमा विचाराधीन विद्यालय शिक्षा विधेयक तत्काल पारित गर्नुपर्ने माग गर्दै देशभरका सामुदायिक विद्यालयका शिक्षक आन्दोलनमा छन्।
माघ २० गतेदेखि नेपाल शिक्षक महासंघको अगुवाइमा सुरु भएको आन्दोलन चैत २० गतेदेखि राजधानी केन्द्रित प्रदर्शनमा परिणत भएको छ। सरकारले वार्ताका लागि डाके पनि शिक्षकहरू गएका छैनन्। सडकमा दबाब दिएरै ऐन पारित गराउने पक्षमा शिक्षकहरू छन्। विधेयकबारे छलफल हुने थलो संघीय संसद्को हिउँदै अधिवेशन भने बन्द भइसकेको छ। शिक्षकहरू अध्यादेशबाट भए पनि विधेयक पारित गराउनुपर्ने पक्षमा छन्।
