सरकारले जनतामाथि गोली चलाउँदै बर्बरतापूर्वक दमन गर्‍यो : पशुपतिशमशेर जबरा

काठमाडौँ- राष्ट्रिय प्रजातन्त्र पार्टीका पूर्वअध्यक्ष पशुपति शमशेर राणाले वरिष्ठ उपाध्यक्ष रवीन्द्र मिश्र, महामन्त्री डा. धवल शमशेर राणा लगायतलाई सरकारले तत्काल निसर्त रिहा गर्नु पर्ने बताएका छन्।

‘संवैधानिक राजसंस्था चाहियो, सनातन हिन्दु अधिराज्य चाहियो, संघीयता खारेजी होस्, भ्रष्टाचार र कुशासनको अन्त्य होस् भनी चैत्र १५ गते नेपाली जनताले गरेको शान्तिपूर्ण कार्यक्रममा सरकारले जनतामाथि गोली चलायो, बर्बरतापूर्वक दमन गर्‍यो। बिना कारण गैरकानुनी रुपमा जनतालाई पक्राउ गर्‍यो,’ राप्रपाका पूर्वअध्यक्ष राणाले भने।

‘यस सन्दर्भमा म वर्तमान सरकारलाई राप्रपाका वरिष्ठ उपाध्यक्ष रवीन्द्र मिश्र, महामन्त्री तथा सांसद डा. धवल शमशेर राणा लगायत अन्य राष्ट्रवादी साथीहरुको निसर्त रिहाइको माग गर्दछु,’ पत्रकारसँगको एक भेटघाट कार्यक्रममा राणाले।

वरिष्ठ राजनीतिज्ञ राणाले तीनकुने घटनामा उच्चस्तरीय न्यायिक छानबिन आयोग गठन नगर्ने सरकारको भूमिकामा आशंका व्यक्त गरे।

उनले भने, ‘घटनाको सन्दर्भमा एक उच्चस्तरीय न्यायिक छानबिन आयोग गठन गरी दोषी उपर कडा कारबाही गर्न म जोडदार रूपमा आह्वान गर्दछु।’

राणाले भने, ‘वास्तवमा यस किसिमको आयोग तत्काल गठन भइ, त्यसको निष्कर्ष प्राप्त भएर कारवाही भइसक्नु पर्दर्थ्यो। यस प्रकारको ढिलासुस्तीमा पनि सरकार नै पूर्ण दोषी छ। सरकारको यो पासविक दमन र बर्बरतापूर्ण कारबाहीको म घोर भत्सर्ना गर्दछु।’