हिमाल प्रेस 
काठमाडौँ- इन्डियन प्रिमियर लिग (आईपीएल) मा लखनउ सुपर जायन्ट्सले दोस्रो जित हासिल गरेको छ। शुक्रबार मुम्बई इन्डियन्सलाई १२ रनले हराउँदै लखनउले दोस्रो जित निकालेको हो।
लखनउले दिएको २०४ रनको लक्ष्य पछ्याएको मुम्बईले २० ओभरमा ५ विकेट गुमाएर १९१ रन मात्र बनायो। सूर्यकुमार यादवले अर्धशतक बनाएपनि पर्याप्त हुन सकेन।
उनले ४३ बलमा ६७ रन बनाए। हार्दिक पान्ड्या २८ रनमा अविजित रहे भने तिलक वर्मा २५ रनमा रिटायर्ड आउट भए। अन्तिम १२ बलमा २९ रन आवश्यक रहँदा १९औं ओभरमा शार्दुल ठाकुरले ७ रन मात्र दिए। अन्तिम ओभरको पहिलो बलमा छक्का प्रहार गरेपनि बाँकी बलमा बाउन्ड्री आउन सकेन।
लखनउका शार्दुल ठाकुर, आकाश दीप, दिग्वेश राथी र आवेश खानले १-१ विकेट लिए। त्यसअघि टस हारेर पहिले ब्याटिङ गरेको लखनउले २० ओभरमा ८ विकेट गुमाएर २०३ रन बनाएको थियो।
लखनउका लागि मिचेल मार्श र एइडेन मार्क्रमले अर्धशतक बनाएका थिए। मार्शले ६० र मार्करमले ५३ रन बनाएका थिए। मुम्बईका कप्तान हार्दिक पान्ड्याले ४ ओभरमा ३६ रन दिएर ५ विकेट लिए । ट्रेन्ट बोल्ट, अश्वनी कुमार र विग्नेश पुथुरले १-१ विकेट लिए।
