ट्रम्पको करविरूद्ध चीनको जवाफ, अमेरिकी आयातमा ३४ प्रतिशत कर लगाउने घोषणा

काठमाडौँ– चीनले शुक्रबार अमेरिकी आयातमा ३४ प्रतिशत कर लगाउने घोषणा गरेको छ।

अमेरिकी राष्ट्रपति डोनाल्ड ट्रम्पको बढ्दो विश्वव्यापी व्यापार युद्धमा नयाँ करहरू विरुद्ध जवाफी कारबाही गर्ने चीन पहिलो प्रमुख अर्थतन्त्र बनेको छ र यसले बजारहरूलाई गम्भीर नोक्सानी पुर्‍याएको छ।

देशहरू र कम्पनीहरू दुवैले आफ्ना विकल्पहरू तौलिरहेका छन् र युरोपेली संघ (ईयू) अमेरिकी अधिकारीहरूसँग वार्ताका लागि तयार छ।

सम्भावित प्रतिक्रियाहरूमा प्रतिशोधात्मक भन्सार शुल्क वा अन्य उपायहरू समावेश हुन सक्छन्। यसले व्यापार युद्धलाई बढाउन सक्छ र मन्दीको डर उत्पन्न गरेको छ।

संयुक्त राज्य अमेरिकाको शीर्ष व्यापारिक साझेदारहरू मध्ये एक चीन सबै अमेरिकी आयातमा ३४ प्रतिशत भन्सार शुल्क अप्रिल १० देखि लागू हुने घोषणा गर्ने पहिलो मुलुक थियो। चीनले भन्सार शुल्कहरूमाथि विश्व व्यापार संगठन (डब्लूटीओ) मा मुद्दा दायर गर्ने बताएको छ।

चीनले चिकित्सा प्रविधि र उपभोक्ता इलेक्ट्रोनिक्समा प्रयोग हुने केही दुर्लभ खनिज तत्वहरूमा निर्यात नियन्त्रण लगाउने पनि बताएको छ।

न्युयोर्कको एस एन्ड पी ५०० सूचकांक चार दशमलव आठ प्रतिशतले घटेको बिहीबारको उथलपुथलपछि एसियाली र युरोपेली सेयर बजारले आफ्नो घाटालाई बढाएका छन्। यो सन् २०२० मा कोभिड महामारीपछिको सबैभन्दा ठूलो गिरावट थियो।

युरोपमा शुक्रबार दिउँसोपछि फ्र्याङ्कफर्ट पाँच प्रतिशतले घटेको छ भने पेरिस चार प्रतिशतभन्दा बढी र लन्डन तीन दशमलव आठ प्रतिशतले घटेको छ।

टोकियोको निक्केई सूचकांक दुई दशमलव आठ प्रतिशतले घटेको छ। जापानी प्रधानमन्त्री सिगेरु इसिबाले ट्रम्पको भन्सार शुल्कलाई ‘राष्ट्रिय संकट’ का रूपमा वर्णन गरेका छन्।

आफ्नो फ्लोरिडा गल्फ रिसोर्टमा सप्ताहन्तमा सेयरमा ‘उछाल’ आउने भन्दै ट्रम्पले पत्रकारहरूलाई बिहीबारको उथलपुथललाई खारेज गरे।

उनले शनिबारदेखि लागु हुने गरी सबै राष्ट्रमा १० प्रतिशत आयात भन्सार शुल्क लगाउने र अर्को हप्ताबाट लागु हुने गरी दर्जनौँ विशिष्ट देशबाट आयातमा धेरै बढी कर लगाउने घोषणा गरेका छन्।

देशहरूले भन्सार शुल्कको आलोचना गरेका छन्। तर चीनबाहेक उनीहरूले संयुक्त राज्य अमेरिकासँग वार्ताको प्रस्ताव गर्दै अहिलेसम्म प्रतिशोधात्मक उपायहरू रोकेका छन्।

ट्रम्पले २७–राष्ट्र ब्लकमा २० प्रतिशत भन्सार शुल्क लगाएपछि ईयू व्यापार प्रमुख मारोस सेफकोभिक शुक्रबार अमेरिकी समकक्षीहरूसँग कुरा गर्नेछन्।

सेफकोभिकले बिहीबार ईइूले ‘शान्त, सावधानीपूर्वक चरणबद्ध, एकीकृत तरिकाले’ काम गर्ने र वार्ताका लागि समय दिने बताए। यद्यपि उनले ‘यदि हामी निष्पक्ष सम्झौतामा पुग्न सकेनौँ भने ब्लक खाली हात बस्नेछैन’ भनी चेतावनी दिए।–रासस/एएफपी