हिमाल प्रेस 
काठमाडौँ- राष्ट्रिय प्रजातन्त्र पार्टीले चैत १५ गते काठमाडौंको तीनकुनेलगायतका क्षेत्रमा भएको घटनाको निष्पक्ष छानबिन गर्न माग गर्दै शुक्रबार काठमाडौँमा प्रदर्शन गरेको छ। तीनकुने घटनामा एकपक्षीय ढंगले व्याख्या गर्ने काम भएको भन्दै घटनाको निष्पक्ष छानबिन गर्न माग राप्रपाले गरेको हो।
राप्रपा नेताहरू रवीन्द्र मिश्र र डा. धवलशमशेर राणा लगायतमाथि झुटा मुद्दा लगाइएको भन्दै खारेज गर्नुपर्ने राप्रपाको माग छ। त्यस्तै राप्रपाले राज्य आतंक बन्द गर्नुपर्ने, नागरिक स्वतन्त्रता कायम गर्नुपर्ने जनाएको छ।
प्रदर्शनपछि आयोजित सभामा राप्रपा नेता पशुपतिशमशेर राणाले बहुदलीय प्रजातन्त्रभित्र फरक मत राख्न पाउने अधिकार सबैको रहेको भन्दै फरक मत राखेकै आधारमा नेताहरुलाई पक्राउ गर्नु उचित नभएको बताए।
उनले चैत १५ गते राज्यबाट दमन भएको भन्दै भर्त्सना गरे। आफ्नो नेताहरुलाई रिहाइ नगरेसम्म निरन्तर आन्दोलन गर्ने राप्रपाले जनाएको छ।
