हिमाल प्रेस 
काठमाडौँ- नेपाल ग्रामीण चलचित्र महोत्सवको चौथो संस्करण रसुवा जिल्लाको गोसाईकुण्ड गाउँ पालिकामा हुने भएको छ।
आयोजक सेलिब्रेटी नेपालले रसुवास्थित धुन्चेमा पत्रकार सम्मेलन गर्दै वैशाख ४ देखि ६ गतेसम्म महोत्सव गर्न लागिएको जानकारी दिएको हो।
आयोजकका अनुसार प्रत्येक वर्ष फरक-फरक जिल्लाको ग्रामीण भेगमा आयोजना गर्ने महोत्सवमा ग्रामीण परिवेशमा बनेका नेपाली फिचर फिल्म, सर्ट फिल्म, डकुमेन्ट्री र कल्चर फिल्म प्रदर्शन गर्ने गरिनेछ।
महोत्सवमा यसपटक करिब २ दर्जनजति फिल्म देखाइने र फिल्मका सम्बन्धित व्यक्तिहरूसँग छलफल अन्तरक्रिया गरिनेछ। नेपाली फिल्म पर्यटन र ग्रामीण कथालाई समेटेर विभिन्न संवाद कार्यक्रम पनि गरिने महोत्सवका अध्यक्ष रघुनाथ सापकोटाले बताए।
उनका अनुसार महोत्सवमा स्थानीय पर्यटन प्रर्वद्धन र स्थानीय कला संस्कृतिको प्रचार सामग्री पनि राखिनेछ। महोत्सव संयोजकमा निर्देशक कमल एक्चै मगर छन्।
महोत्सवमा करिब ४ हजार दर्शक उपस्थित गराउने लक्ष्य आयोजकको लक्ष्य छ। महोत्सवमा चलचित्र विकास बोर्डले सहकार्य गरेको छ।
