हिमाल प्रेस 
काठमाडौँ- गत असोज ३ मा प्रदर्शन भएको फिल्म ‘खुस्मा’ निर्माण टिमले ‘जलाकी’ बनाउने घोषणा गरेको छ। फिल्मको टाइटल सार्वजनिक गर्दै निर्माण टिमले घोषणा गरेका हुन्। फिल्म अशोक थापा मगरले निर्देशन गर्नेछन्।
कसैको सम्झना र मायाको प्रतिकको रुपमा मानिने ‘जलाकी’ शब्दले मगर समुदायको आस्थाको प्रतिक ढुंगाले चिनेको स्तम्भ भन्ने अर्थ लाग्छ। फिल्मले मगर र गुरुङ समुदायको संस्कृतिलाई झल्काउने टिमको दाबी छ।
फिल्म पोखराको बिन्ध्याबासिनी मन्दिरमा शुभ मुहूर्त गरिएको छ। साथै बागलुङको कालिका भगवती मन्दिरमा आजदेखि नै फिल्मको छायांकन सुरू गरिएको निर्देशक मगरले बताए।
त्रिकोणात्मक प्रेम कथामा आधारित फिल्ममा ‘शाम्बाला’ फेम्ड अभिनेता सोनाम तोप्देन, उपासना सिह ठकुरी, अस्तित्व भट्टचन र आकृति राज भण्डारीको मुख्य भूमिका रहनेछ।
गायक सुशान्त केसीको चर्चित गीत ‘बार्दली’ बाट चर्चा कमाएकी मोडल आकृति राजभण्डारीको यो डेब्यु फिल्म हो। फिल्ममा अन्य कलाकार माओत्से गुरुङ, बुद्धि तामाङ, संगीता थापा मगर, राजु रेग्मी मगर, खड्क बहादुर पुन (खबपु) लगायतको अभिनय रहनेछ।
फिल्मको छायांकन तीन चरणमा गर्ने तयारी रहेको निर्देशक अशोक थापा मगरले बताए। उनका अनुसार रुकुम, म्याग्दी, बाग्लुङ, पोखराका विभिन्न क्षेत्र र दक्षिण कोरियामा समेत छायांकन गरिनेछ। शैलेन्द्र डी कार्कीले छायांकन गरिरहेका छन्।
एम मिडियाको ब्यानरमा निर्माण हुने फिल्मका निर्मातामा ओम घर्तीमगर, वीर बहादुर लामा, चन्द्र बहादुर भट्टचन, बेताने मगर (बबिता राना) मान बहादुर धनाह मगर र सुस्मिता बुढाथोकी छन्।
