हिमाल प्रेस 
काठमाडौँ- नेकपा एमालेकी पोलिटब्युरो सदस्य तथा प्रतिनिधिसभा सदस्य ज्वालाकुमारी साहले विगत दुई वर्षदेखि संसद्मा कानुन निर्माणमा विशेष ध्यान केन्द्रित गरेको बताएकी छन्।
उनका अनुसार केही कानुनहरू बनिसकेका छन् भने अन्य कानुनहरू जस्तै निजामती, शिक्षा, प्रहरी ऐन अझै निर्माणाधीन छन् र संसद्मा छलफल भइरहेको छ। उनले शिक्षा, स्वास्थ्य, बेरोजगारी, महँगी, भ्रष्टाचार, महिला हिंसा, बाढी, पहिरो र भूकम्प जस्ता समसामयिक विषयमा सरकारको ध्यान आकर्षित गर्दै आएको बताइन्।
महिला सशक्तीकरणका लागि सरकारले नीति कार्यक्रम र बजेटमा समावेश गर्दै आएकोमा साहले खुसी व्यक्त गर्दै भनिन्, ‘शिक्षा र स्वास्थ्यमा पनि सुधार आएको छ।’ साथै, उनले संविधान संशोधन र निर्वाचन प्रणालीमा सुधार गर्नुपर्ने आवश्यकतापनि औंल्याइन्।
साहले नेपालमा नकारात्मक सोच र ‘केही पनि गर्न सकिँदैन’ भन्ने भाष्य बनाइएको बताइन्। उनले भनिन्, ‘नेपालमा धेरै सम्भावना छन्, धेरै गर्न सकिन्छ। अब हामीले सकारात्मक सोच राखेर देशलाई अगाडि बढाउनुपर्ने छ।’
