
काठमाडौँ- आजदेखि हलमा फिल्म ‘वसन्त’ प्रदर्शन भएको छ। फिल्ममा गायक, अभिनेता र निर्देशक प्रकाश सपुत र अभिनेत्री स्वस्तिमा खड्का मुख्य भूमिकामा छन्। फिल्म प्रकाशले नै निर्देशन गरेका छन्। यो उनको डेब्यु निर्देशनमा बनेको फिल्म हो।
फिल्मले मल्टिप्लेक्सदेखि सिंगल हल उच्च सो पाएको छ। देशैभर ३ सय हाराहारीमा सो पाएको निर्माण टिमको दाबी छ।
गलबन्दी प्रोडक्सनको प्रस्तुति रहेको फिल्म सामाजिक कथामा आधारित छ। फिल्मको कथा, पटकथा र संगीत निर्देशक सपुतले नै तयार पारेका हुन्। फिल्ममा विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा प्रस्तुत गरिएको छ।
फिल्ममा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणि नेपाल, प्रकाश घिमिरे, विशाल पहारीलगायतको अभिनय छ।
फिल्म गायक तथा निर्देशक सपुतको जन्मथलो बागलुङ, काठमाडौँ र तराईका विभिन्न ठाउँमा छायांकन गरिएको छ। फिल्मको निर्मातामा मोहन विश्वकर्मा र बिन्दु बोहोरा छन्।