हिमाल प्रेस 
काठमाडौँ- एकीकृत अखिल नेपाल राष्ट्रिय शिक्षक संगठनका अध्यक्ष शंकर अधिकारीले २०८० साल असोजको आन्दोलनलाई सम्झाउँदै शिक्षक कर्मचारीहरूको संघर्षलाई बेमौसमी नठान्न चेतावनी दिएका छन्।
काठमाडौँमा जारी आन्दोलनको सन्दर्भमा प्रतिक्रिया जनाउँदै उनले आन्दोलनको कारण शिक्षाको क्षेत्रमा ऐतिहासिक सहमति हासिल भएको र विद्यालय शिक्षा विधेयकलाई संसदीय प्रक्रियामा अघि बढाउन सरकारलाई बाध्य पारिएको बताएका छन्।
२०८० सालको ‘आन्दोलन बेमौसमी’ भनिएको र ‘अहिले पनि त्यस्तै भइरहेको’ भन्नेमा आपत्ति जनाउँदै अध्यक्ष अधिकारीले २०८० र त्यसअघिका सहमति सम्झौता अनुसार ऐन जारी गर्न अहिले सरकारलाई दबाब दिएको बताएका छन्। ‘अब सम्झौताका आधारमा ऐन जारी गरेरै छाडिन्छ,’ उनले भने।
उनले शिक्षक कर्मचारीहरूको अपमान नगर्न र तिनका संघर्षलाई सम्मान गर्न आह्वान गर्दै, ‘हजारौं शिक्षक कर्मचारी सडकमा उत्रिएको बेला तिनका अपमान नगर, आफ्नै सदस्यहरूको अपमान नगर जसले तिमीलाई नेता बनाएका छन्,’ भने।
अध्यक्ष अधिकारीले संघसंगठनभित्रका धोकेबाज नेताहरूलाई चिन्ने बेला आएको पनि स्पष्ट पारेका छन्। ‘शिक्षक कर्मचारी साथीहरू, अब समय आएको छ कि हामी हाम्रो मित्र र धोकेबाज नेताहरूसँग छुट्टिनेछौं,’ उनले थपे।
