हिमाल प्रेस 
कञ्चनपुर- डढेलो लाग्न नदिनका लागि डिभिजन वन कार्यालयले उच्च सतर्कता अपनाएको छ। कार्यालयले डढेलो नियन्त्रणका लागि कर्मचारी, दमकल, ट्रयाक्टरलाई चौबीसै घण्टा तयारी अवस्थामा राखेको छ।
डिभिजन वन कार्यालयका प्रमुख रामविचारी ठाकुरका अनुसार वन क्षेत्रमा डढेलो लागेको जानकारी प्राप्त भएको खण्डमा कर्मचारीलाई आवश्यक सामग्रीसहित पठाउने व्यवस्था मिलाइएको छ।
सामुदायिक वन, चुरे संरक्षण सञ्जाल र सामुदायिक वन समन्वय समितिहरूसँग समन्वय गरी डढेलो नियन्त्रणका लागि आवश्यक सामग्री उपलब्ध गराइन्छ। साथै, अग्नि नियन्त्रक टोली परिचालनका लागि तयारी गरिएको छ।
सामुदायिक वनका उपभोक्तालाई सचेत बनाउने कार्य, वन क्षेत्रमा अग्निरेखा तयार गर्ने र चेतनमूलक कार्यक्रम सञ्चालन गर्ने कार्य अघि बढाइएको छ। यस वर्ष हिउँदे वर्षा नहुँदा जमिन सुक्खा रहेको कारण तापक्रमको वृद्धि र डढेलोको सम्भावना बढी भएको उल्लेख गर्दै कार्यालय प्रमुख ठाकुरले डढेलो नियन्त्रणको लागि निरोधात्मक उपाय अवलम्बन गरिएका छन्।
सामुदायिक वन समन्वय समिति कञ्चनपुरले ९४ सामुदायिक वनमा २५ जनाको दरले अग्नि नियन्त्रक टोली गठन गरेको छ। समितिको संयोजकत्वमा अग्नि नियन्त्रक मूल समिति गठन गरी कार्यान्वयन गरिएको छ। एकीकृत सूचना प्रणालीमार्फत डढेलोको सूचना प्रवाहको व्यवस्था गरिएको छ।
