आज हल्का वर्षा र हिमपातको सम्भावना

काठमाडौँ- हाल देशमा पश्चिमी वायु र स्थानीय वायुको आंशिक प्रभाव रहेको जल तथा मौसम पूर्वानुमान महाशाखाले जनाएको छ। यसकारण कोशी, मधेस, बागमती प्रदेशलगायतका पहाडी भू-भागमा आंशिक बदली रहनेछ। बाँकी भू-भागमा मौसम मुख्यतया सफा हुनेछ।

आज दिउँसो देशका पहाडी भू-भागमा आंशिक बदली रहनेछ र बाँकी भू-भागमा मौसम मुख्यतया सफा रहनेछ। गण्डकी र कर्णाली प्रदेशका पहाडी भू-भागका एक/दुई स्थानमा चट्याङसहित हल्का वर्षा हुने सम्भावना रहेको छ। साथै, देशका उच्च पहाडी र हिमाली भू-भागका एक/दुई स्थानमा हल्का हिमपातको सम्भावना रहेको छ।

आज राति कोशी प्रदेश र गण्डकी प्रदेशका पहाडी भू-भागमा आंशिक बदली रहँदा बाँकी भू-भागमा मौसम सफा रहनेछ। महाशाखाले गण्डकी र कर्णाली प्रदेशका पहाडी भू-भागका एक/दुई स्थानमा हल्का वर्षा र उच्च पहाडी तथा हिमाली भू-भागमा हल्का हिमपातको सम्भावना रहेको भन्दै जनजीवन, कृषि, सडक र हवाई यातायातमा प्रभाव पर्न सक्ने हुँदा सतर्कता अपनाउन अनुरोध गरेको छ।