हिमाल प्रेस 
तस्बिर : सुनसरी प्रहरी
इटहरी– सुनसरीमा सात वर्षीया बालिका अपहरणमा परेकी छन्। अपहरणमा परेकी बालिकाको बिहीबार सकुशल उद्दार गरिएको छ।
जिल्ला प्रहरी कार्यालय सुनसरीका प्रहरी उपरीक्षक (एसपी) सुमनकुमार तिम्सिनाका अनुसार बुधबार दिउँसो १ः४० बजेतिर कोशी गाउँपालिका वडा नं. ७ मुसहरी टोल बस्ने कुशेश्वर सदाकी सात वर्षीया छोरी ईशु सदालाई घरअगाडि खेल्ने क्रममा अपरिचित मानिसले सिटी सफारी चढाएर अपहरण गरेको प्रहरीमा सूचना आएको थियो।
सूचनाका आधारमा डीएसपी योगराज खतिवडाको नेतृत्वमा टोली परिचालन भएको थियो। खतिवडाको कमाण्डमा ९ सदस्यीय अनुसन्धान टोली गठन गरी कोशी प्रदेश प्रहरी कार्यालय विराटनगरबाट ‘प्रोभिन्स इन्भेस्टिगेसन टिम’ समेत परिचालन भएको थियो।
अपहरणमा परेको २४ घण्टाभित्रै ती बालिकाको उद्दार गर्न सफल भएको एसपी तिम्सिनाले जानकारी दिए।
‘हामीले आज दिउँसो सप्तकोसी नदीको पुलस्थित २६ नम्बरको ढोकाबाट फेला पारेका हौँ,’ एसपी तिम्सिना भन्छन्, ‘कुनै मानवीय क्षति हुन नदिन र घटनामा संलग्नलाई नियन्त्रणमा लिन सफल भएका छौँ।’
बालिकाको अपहरणमा संलग्न सप्तरीको कञ्चनरूप नगरपालिका– १२ धरमपुरका ३१ वर्षीय जितुवा भनिने जितेन्द्र साह (हलुवाई) लाई पक्राउ गरिएको हो।
अपहरणमा परेकी ती बालिकालाई भारततर्फ लगेको हुनसक्ने आशंकामा प्रहरीले भारतीय प्रहरीसँग समन्वय गरिरहे पनि सुनसरीतर्फ नै पर्ने सप्तकोसी पुलबाट पक्राउ गरेको एसपी तिम्सिनाले जानकारी दिए।
साह भारतमै बसोबास गर्दै आएको प्रहरीको प्रारम्भिक अनुसन्धानबाट खुलेको छ। उनलाई बिहीबार जिल्ला अदालत सुनसरीबाट म्याद थप गरी विभिन्न कोणबाट अनुसन्धान जारी राखेको एसपी तिम्सिनाले बताए।
कोशी गाउँपालिका– ७ का वडाध्यक्ष लालदेव सदाका अनुसार बालिकाको अपहरण गर्ने साह यसअघि पनि बालिकाको घर आसपास आउनेजाने गरेको खुलेको छ। बुधबार भने बालिकाको घरमा कोही नभएको मौका छोपेर उनलाई ललाईफकाई सफारीमा राखेर भारततर्फ लैजाने प्रयास गरेको उनले जनाए।
उनका अनुसार बुधबार अपहरण गरेका साहले सो दिन भने सप्तरीको राजविराज पु¥याएर राखेका थिए। बिहीबार कोशी ब्यारेज हुँदै भारततर्फ लैजान खोजिएको अवस्थामा प्रहरीले नियन्त्रणमा लिएको हो।
बालिका अपहरणमा परेको सूचना आएपछि प्रहरीले विभिन्न कोणबाट अनुसन्धान सुरू गरेको थियो। ‘बालिका अपहरणमा परेको सूचना आएपछि हामीले सिसिटिभी फुटेज हेरेर खोजीलाई तीव्र बनाएका थियौँ,’ एसपी तिम्सिना भन्छन्, ‘पक्राउ परेका साहले यसअघि पनि नेपाल र भारत दुवै देशमा चोरी गर्ने र बालबालिकालाई अपहरण गर्ने प्रारम्भिक अनुसन्धानबाट देखिन्छ।’
प्रहरीको अनुसन्धानअनुसार बालिकाको अपहरणमा हालसम्म उनको मात्रै संलग्नता देखिएको छ। यद्यपि, थप अनुसन्धान भने जारी राखेको सुनसरी प्रहरीले जनाएको छ।
