इटहरी – १६ पुस २०८१ मा इटहरी उपमहानगरअघि, बूढीखोला र धरानको भोटेपुल नजिकै बम राखेको भन्दै प्रहरीमा म्यासेज आयो। ‘अब आन्दोलन सुरू भयो’ भन्ने प्रकृतिको म्यासेज बिहान ४ः३६ बजे इलाका प्रहरी कार्यालय इटहरी र इलाका प्रहरी कार्यालय पकलीमा आएको थियो।
त्यससँगै प्रहरीले विशेष सावधानी अपनायो। नेपाली सेनाले डिस्पोज गर्ने क्रममा प्रेसर कुकर फेला पार्यो। प्रहरीलाई म्यासेजमा तीन ठाउँ बम राखिएको भनेर सूचना आए पनि उपमहानगर गेटअघि मात्रै प्रेसर कुकर फेला परेको र अन्यतिर भने आतंक मच्चाउनका लागि मात्रै प्रहरीलाई गलत सूचना दिइएको थियो।
डिस्पोजका क्रममा उक्त कुकरभित्र राष्ट्रिय सुरक्षा दल लेखिएको पर्चा भेटिएको थियो। पर्चामा हिन्दु राष्ट्र स्थापना, संघीयता खारेजी गर्नुपर्ने, स्थानीय तहलाई बलियो बनाउनुपर्ने, प्रत्यक्ष निर्वाचित प्रधानमन्त्रीको व्यवस्था हुनुपर्ने लगायतका माग राखिएको थियो।
यो घटनामा संलग्नलाई प्रहरीले तीन महिनापछि पक्राउ गरी सार्वजनिक गरेको छ। पक्राउ पर्नेमा झापाको दमक नगरपालिका–१ का ४७ वर्षीय सञ्जय भनिने खगेन्द्र खरेल र इटहरी–४ की ३६ वर्षीया लक्ष्मीदेवी थापा रहेकी छन्।
जिल्ला प्रहरी कार्यालय सुनसरीका प्रहरी उपरीक्षक (एसपी) सुमनकुमार तिम्सिनाका अनुसार ९८१४३४७२९० मोबाइल नम्बरबाट म्यासेज गरी बम रहेको भन्दै प्रहरीलाई सूचना दिइएको थियो। खोजी गर्ने क्रममा प्रहरीले तीन महिनापछि फेला पारेर नियन्त्रणमा लिएको हो।
बम राखेर सर्वसाधारणलाई आतंक फैलाएर फरार रहेका दुवै जनालाई सुनसरीको कोशी गाउँपालिका–८ स्थित भण्टाबारीमा लुकिछिपी बसेको सूचनाका आधारमा पक्राउ गरिएको एसपी तिम्सिनाले जानकारी दिए। खासगरी भारतमा लुकिछिपी बसेको अवस्थामा खरेल र थापालाई प्रहरीले बुधबार रातिमात्रै सुनसरीको भण्टाबारी नाकाबाट नेपाल ल्याएको हो।
प्रहरीको प्रारम्भिक अनुसन्धानअनुसार खरेलले नै बम र बमजस्तो विस्फोटक पदार्थ राखेको भन्दै प्रहरीलाई म्यासेज पठाएको खुलेको छ। ‘पक्राउ परेका खरेल सुनसरी प्रहरीको अभिलेखमा दोस्रोपटक पक्राउ परेका व्यक्ति हुन्,’ एसपी तिम्सिनाले भने, ‘पक्राउ परेका व्यक्ति पटकपटक जेल सजाय काटेर आएका व्यक्ति हुन्।’
पक्राउ परेका दुवै जनामाथि जिल्ला अदालत सुनसरीबाट बिहीबार पाँच दिनको म्याद थप भएको छ। म्याद थप गरेपछि प्रहरीले घटनामा संलग्नलाई पक्राउ गरेको हो।
‘घटनामा संलग्नमाथि थप अनुसन्धान भइरहेको छ,’ एसपी तिम्सिना भन्छन्, ‘पक्राउ परेकाहरू यसअघि पनि जेल सजायबाट निस्किएको र सोही प्रकृतिको घटनामा संलग्न भएको पुष्टि भएको छ। यद्यपि, थप अनुसन्धान भइरहेको छ।’
खासगरी प्रहरीले खरेललाई यसअघि पनि विष्फोटक पदार्थकै प्रयोगमा पक्राउ गरेको थियो।
प्रहरीको अभिलेखअनुसार १४ चैत २०७८ राति करिब ११ बजेतिर इटहरी–२, नवजागृति टोलमा बम विष्फोट भयो। विष्फोटबाट कोठाभाडामा बस्दै आएका २२ वर्षीय रविन थापा र लमजुङ–५, ढोडेनीका २३ वर्षीय शेरजंग गुरुङ घाइते भए। प्रहरीको अनुसन्धानबाट सुतली बम रहेको पुष्टि भयो। घटनास्थलबाट बम विष्फोटमा हिमाल सुरक्षा परिषद् नेपालको पर्चा बरामद भयो। उक्त पर्चामा संघीयता खारेज, ५ विकास क्षेत्र कायम गरिनुपर्ने, हिन्दु राष्ट्र कायम गर्नुपर्ने, नागरिकता छानबिन गर्नुपर्ने, भारत–चीन सीमा विवाद समाधान गरिनुपर्ने, स्वदेशी उत्पादनलाई प्राथमिकता दिनुपर्ने, एमसीसी सम्झौता खारेज गरिनुपर्ने लगायतका मागहरू राखिएको थियो।
घटनाको अनुसन्धानपछि प्रहरीले पाँच जनालाई पक्राउ गरेको थियो। थापा र गुरुङसँगै खगेन्द्र खरेल, उत्तम रिजाल र लक्ष्मीदेवी थापा ठकुरी थिए। पक्राउ परेकामध्ये खगेन्द्र मुख्य नाइके रहेको खुलेको थियो।
प्रहरीका अनुसार हिमाल सुरक्षा परिषद्को नाममा बम विस्फोट र संगठित अपराध गरेको आरोपमा मुख्य अभियुक्त खरेलसहित लक्ष्मीदेवी र शेरजंगलाई जिल्ला अदालत सुनसरीले पुर्पक्षको लागि कारागार चलान गरेको थियो।
बम विस्फोट र संगठित अपराध गरेको कसुरमा प्रमुख अभियुक्त रहेका खरेल दोषी ठहर भएपछि २०७९ जेठ २० देखि २०८१ असोज १४ गते सम्म खरेलले जेल जीवन बिताए। उनी जेल जीवन बिताएर छुटिसकेपछि पुनः बम बिष्फोट गराउने उद्देश्यले अफवाह फैलाउने गरेको खुलेसँगै प्रहरीले नियन्त्रणमा लिएको छ।
पटकपटक एकै व्यक्ति यस्ता घटनामा संलग्न हुनुले प्रहरीलाई चुनौतीसमेत थपिएको छ। अदालतले निश्चित समयका लागि कारागार चलान गरे पनि कारागारबाट निस्किएपछि भने पुनः आपराधिक गतिविधिमा संलग्न हुने खरेलजस्ता पात्रका कारण प्रहरी प्रशासनलाई यस्ता घटनाको अनुसन्धान र नियन्त्रण लिन कठीन हुने गरेको छ।
खासगरी खरेल २०७६ वैशाख २८ गते गोरखा जनमुक्ति पार्टीको नाममा झापाको कनकाई नदी पुलमा बम राखेको आरोपमा पक्राउ परेका थिए। दुई वर्ष पाँच महिना कैदपछि झापा कारागारबाट उनी छुटेका थिए।
२०७८ माघ माघ ९ गते बिर्तामोडस्थित पश्चिम बस बिसौनी र माघ १३ गते दमकस्थित सिवान चर्चमा हिमाल सुरक्षा परिषद्को पर्चासहित प्रेसरकुकर बम राखेको घटनामा उनी पक्राउ परेका थिए। बम राखेर जनजीवन त्रसित पार्ने कार्यमा उनीहरुकै संलग्नता देखिएपछि जिल्ला प्रहरी कार्यालयले उनीहरुलाई पक्राउ गरेको थियो।
जेलबाट छुटे लगत्तै खरेलले विभिन्न नक्कली फेसबुक आइडी र ग्रुपको निर्माण गरेर संवैधानिक राजतन्त्र, हिन्दू राष्ट्र, एमसिसी खारेजको माग राख्दै प्रचार सामाग्री बनाएर प्रचार गरेको प्रहरीको प्रारम्भिक अनुसन्धानबाट खुल्दै आएको छ।
