चैत १५ को घटनालाई हिंसात्मक र उत्तेजित बनाउने काम सरकारबाट भयो : कमल थापा

काठमाडौँ– राप्रपा नेपालका अध्यक्ष कमल थापाले चैत १५ गते भएको घटनालाई हिंसात्मक र उत्तेजित बनाउने काम सरकारबाट भएको आरोप लगाएका छन्।

बिहीबार काठमाडौंमा राप्रपा नेपालका प्रवक्ता स्वर्गीय वसन्तमान सिंह अधिकारीको १३ औँ दिनको पुण्यतिथिमा आयोजित श्रद्धाञ्जलीमा सभामा थापाले राजवादीको विचारमाथि आक्रमण गर्ने र बदनाम गर्ने प्रयास स्वरुप सरकारले नै चैत १५ गते भएको घटनालाई हिंसात्मक र उत्तेजित बनाउने काम गरेको आरोप लगाए।

घटनाको निष्पक्ष छानविन नभइ एकपक्षीय ढंगले राजावादी र राजसंस्थालाई मुछ्ने काम भएको भन्दै उनले आपत्ति जनाए। अध्यक्ष थापाले चैत १५ गतेको घटनालाई लिएर जनतामा भ्रम परेको भन्दै बिचलित नभइ अघि बढ्ने स्पष्ट पारे। गणतन्त्र पक्षधर दल र केही सञ्चारमाध्यमले सिर्जना गर्न खोजेको भ्रमको तुवाँलो केही दिनपछि हटेर जाने उनको भनाइ छ।

उनले पूर्वराजालाई बदनाम गर्ने झुटा आरोप लगाउने र हिन्दुराष्ट्रको मान्यतालाई निषेध गर्ने, समाप्त पार्ने षडयन्त्रविरुद्ध सजक भएर प्रतिरक्षा गर्न सवै राष्ट्रवादी शक्तिहरु एक ठाँउमा उभिनुपर्नेमा जोड दिए। अब पनि राष्ट्रवादी शक्तिहरु एक ठाँउमा उभिन नसके भविष्यमा पछुताउनुपर्ने अवस्था आउने उनले बताए।