हिमाल प्रेस 
काठमाडौँ- फिल्म ‘जन्ते बाख्रो’ को पहिलो गीत ‘घामै राजा’ सार्वजनिक भएको छ। उपत्यकामा कार्यक्रम गर्दै निर्माण टिमले बिहिबार गीत सार्वजनिक गरेका हुन्।
गीतमा संगीतकार बाबुल गिरीको शब्द रचना, संगीत र स्वर छ। प्रेमिल गीतको भिडियोमा फिल्मका मुख्य कलाकार सौगात मल्ल र गरिमा शर्मा रोमान्टिक अवतारमा देखिएका छन्।
कार्यक्रममा निर्माता सन्तोष गौतमले फिल्म दुई साता अघि सार्दै आगामी वर्ष जेठ ९ देखि प्रदर्शन जानकारी दिए। यसअघि फिल्म जेठ २३ मा प्रदर्शन हुने बताइएको थियो।
निर्माण सन्तोष गौतमले फिल्मका मुख्य अभिनेता सौगात मल्लको अर्को फिल्म ‘भाईरल गोर्खे’ एक साताको फरकमा प्रदर्शन हुने भएकोले समय अन्तरको लागि दुई हप्ता प्रि-पोण्ड गरेको बताए। उनले ‘जन्ते बाख्रो’ को नेपाल र विदेशमा एकैदिन प्रर्दशन गर्ने तयारी रहेको खुलाए।
फिल्ममा सौगात मल्ल, आशिफ शाह, गरिमा शर्मा, रमा थपलिया, लोकेन्द्र लेखक, कमल देवकोटा, विशाल पहाडी, रुशा न्यौपाने, कुसुम शर्मा, स्नेहा जोशी, समापिका गौतम, कुशल गजमेर लगायत कलाकारको अभिनय छ।
फिल्मका निर्देशक सिमोस सुनुवार हुन्। मुईन इन्टरटेनमेन्टको प्रस्तुति रहेको फिल्म सामाजिक कथामा कमेडी शैली प्रस्तुत गरिएको छ। फिल्ममा प्रदीप भारद्धाजको कथा, पटकथा र संवाद लेखन छ। फिल्मका निर्माता सन्तोष गौतम हुन्।
हरि हुँमागाईंको डिओपी, उत्तम हुँमागाईंको सिनेमाटोग्राफी रहेको फिल्म सुनिल शिवभक्तिको सम्पादन र रोयल भिमसेन (ट्राइडेन्ट कन्सेप्ट टिम) को पोस्टर डिजाइनमा बनेको छ।
