हिमाल प्रेस 
काठमाडौँ– सरकार र सहकारी तथा लघुवित्त संघर्ष समितिबीच भएको सहमति कार्यान्वयन नभएको भन्दै काठमाडौँमा प्रदर्शन भएको छ।
सहकारी बचतकर्ता संरक्षण राष्ट्रिय अभियान महासंघको अनुवाईमा काठमाडौँमा आन्दोलन सुरु भएको हो। आन्दोलनका लागि विभिन्न जिल्लाबाट लघुवित्तपीडित काठमाडौँ आएका छन्। बिहीबार उनीहरुले काठमाडौँको माइतिघरदेखि बानेश्वरसम्म प्रदर्शन गरेका थिए।
सहकारीपीडित, लघुवित्तपीडित तथा मिटरब्याजपीडितहरुसँग यसअघि सरकारले गरेको सहमति कार्यान्वयन नगरेको भन्दै पुनः आन्दोलन गर्नुपरेको महासंघका अध्यक्ष कुशलभ केसीले बताए। उनले सरकारले पटकपटक सम्झौता गर्ने तर पीडितको समस्या समाधान नगर्ने गरेको आरोप लगाए।
समस्या समाधानका लागि विभिन्न समिति बनाएर प्रतिवेदन बुझाइसके पनि कार्यान्वयनमा समस्या देखिएको महासंघको आरोप छ। प्रदर्शनकारीहरुले लघुवित्त संस्थाहरु खारेज गर्नुपर्ने, सामूहिक ऋण मिनाहा गर्नुपर्ने, मिटरव्याजी तमसुक रद्द गर्नुपर्ने लगायतका मागसमेत अघि सारेका छन्।
