हिमाल प्रेस 
काठमाडौँ- नेपाल शिक्षक महासंघले सरकारसँग तत्काल वार्ता नगर्ने स्पष्ट पारेको छ। शिक्षा मन्त्रालयले आन्दोलन स्थगित गरेर वार्तामा आउन गरेको आह्वानपछि महासंघका अध्यक्ष लक्ष्मीकिशोर सुवेदीको यस्तो प्रतिक्रिया आएको हो।
उनले हिमालप्रेससँग भने, ‘एक त वार्ताको औपचारिक जानकारी हामीकहाँ आएको छैन। हामीलाई वार्ताको कुनै जरुरी छैन।’ उनले वार्ताका लागि खर्चिने समय ऐन निर्माणमा लगाउन पनि सरकार र संसद्लाई आग्रह गरेका छन्। उनले आन्दोलन उत्साहपूर्ण तरिकाले अघि बढेको बताए। उनले भने, ‘विद्यार्थी र शिक्षकमैत्री ऐन लिएर मात्रै फर्कनेछौँ।’
यसअघि बिहीबार नै शिक्षा विज्ञान तथा प्रविधि मन्त्रालयले आन्दोलनरत शिक्षकलाई वार्तामा डाकेको छ। ‘शिक्षक समुदायसँग विगतझैँ फेरि पनि सान्दर्भिक छलफल गर्न र साझा धारणा निर्माण गर्न नेपाल सरकार हमेसा तयार रहेकाले यसका लागि शिक्षक तथा कर्मचारीका प्रतिनिधिहरूलाई मन्त्रालयमा हार्दिक स्वागत गर्दछौँ’, शिक्षा मन्त्रालयका प्रवक्ता शिवकुमार सापकोटाले जारी गरेको विज्ञप्तिमा उल्लेख छ।
नेपाल शिक्षक महासंघको नेतृत्वमा देशभरका शिक्षकहरूले काठमाडौँमा आन्दोलनमा जारी राखेका छन्। महासंघले विद्यालय शिक्षा विधेयक संसद्बाट तत्काल पारित गर्नुपर्ने माग गर्दै आन्दोलन गरेको हो। विधेयक संसद्को शिक्षा स्वास्थ्य तथा सूचना प्रविधि समितिमा विचाराधीन छ।
शिक्षकहरूले संसद्को हिउँदे अधिवेशनबाटै विधेयक पारित गर्नुपर्ने माग राखेका थिए। यद्यपि हिउँदे अधिवेशन अन्त्य भइसकेको छ। शिक्षक नेताहरूले अध्यादेशबाट भए पनि विधेयक ल्याउनुपर्ने माग गरेका छन्। विगतमा सरकार र शिक्षकबीच भएका सहमतिका बुँदा समेटेर विधेयक पारित गर्नुपर्ने जोड शिक्षकहरूको छ।
यसैगरी विद्यालय शिक्षा विधेयक समयमै पारित गर्ने वातावरण सिर्जना गर्नका निमित्त सिंगो शिक्षक समुदायको पैरवी, सरोकार र ऐक्यबद्धताका बारेमा मन्त्रालय सदैव सकारात्मक रहेको मन्त्रालयको भनाइ छ।
विज्ञप्तिमा उल्लेख छ, ‘शिक्षक समुदायका प्रतिनिधिहरूसँगको यथोचित छलफल र परामर्शबाट विधेयकको मस्यौदा तयार गरिएकाले विद्यालय शिक्षा विधेयक चाँडै जारी होस् भन्ने अपेक्षा रहनु र यस विषयप्रति शिक्षक तथा कर्मचारीको चासो रहनु स्वाभाविकै हो।’
शिक्षा मन्त्रालयले विधेयक संसद्मा पेस हुने, छलफल हुने र स्वीकृत हुने विधायकी प्रक्रियाका सम्बन्धमा निश्चित कानुनी बन्दोबस्तबारे पनि स्मरण गराएको छ। विधेयक स्वीकृतिको पर्खाइमा रहेकाले यसका लागि सामूहिक सन्देश प्रवाह गर्न मन्त्रालय सदैव सकारात्मक रहेको विज्ञप्तिमा उल्लेख छ।
अध्यक्ष सुवेदीले बुधबार एक लाख शिक्षक सहभागी भएको आन्दोलनमा शुक्रबार डेढ लाख पुगेको जानकारी दिए। उनले आन्दोलन लम्बिँदै जाँदा अरू शिक्षकहरू थपिँदै जाने बताए। उनले विगतमा सरकारले बोलेका सबै कुरा गलत प्रमाणित भएकाले अब उनीहरूका कुरामा विश्वास नगर्ने बताए।
सुवेदीले आन्दोलनमा जति धेरै शिक्षक सहभागी हुन्छन्, त्यति चाँडै सफलता प्राप्त हुने पनि बताए। उनले सबै शिक्षक-कर्मचारीलाई आन्दोलनको मोर्चामा आउन पनि अपिल गरेका छन्।
