हिमाल प्रेस 
काठमाडौँ- प्रेस सेन्टरले तीनकुने घटनामा परी ज्यान गुमाएका पत्रकार सुरेश रजकको परिवारले अघि सारेको मागप्रति ऐक्यबद्धता जनाएको छ।
बिहीबार रजकको घरमा पुगेर परिवारजनमा समवेदना प्रकट गर्दै उनीहरूले अघि सारेका मागप्रति प्रेस सेन्टरले ऐक्यबद्धता जनाएको हो।
सेन्टरका नवनिर्वाचित अध्यक्ष कमल गिरीको नेतृत्वमा उपाध्यक्षहरू रामसिंह ठगुन्ना र दीपक श्रेष्ठ, महासचिव मनोज घर्तीमगर, निवर्तमान महासचिव सन्तोष पौडेलसहितको टोली दिवंगत पत्रकार रजकको घर पुगेको थियो।
त्यसक्रममा अध्यक्ष गिरीले रजकको मृत्यु नभएर हत्या भएको बताउँदै घटनाको निष्पक्ष छानबिन गर्न, परिवारलाई क्षतिपूर्ति उपलब्ध गराउन र दोषीलाई कडा कारबाही गर्न आफूहरूको माग रहेको बताए।
रिर्पोटिङका क्रममा घटनास्थलमै ज्यान गएकाले रजकलाई सहिद घोषणा गर्नुपर्ने र घटनाको निष्पक्ष छानबिन गरी दोषीलाई कडाभन्दा कडा कारबाही गर्नुपर्ने परिवारजनको माग छ।
अध्यक्ष गिरीले आफूहरू परिवारजनको साथमा रहेको र रजकको न्यायका लागि संगठनको ऐक्यबद्धता रहने बताए। सेन्टरले रजकको परिवारलाई १० हजार नगद सहयोगसमेत गरेको छ।
पत्रकार रजकको चैत १५ गते राजावादीहरूले गरेको प्रदर्शनका क्रममा आगजनीमा परी मृत्यु भएको थियो।
