हिमाल प्रेस 
काठमाडौँ- राष्ट्रिय प्रजातन्त्र पार्टीले गृहमन्त्री रमेश लेखकको राजीनामा माग गरेको छ। पार्टी नेतृत्वले बिहीबार कार्यवाहक प्रधानमन्त्री प्रकाशमान सिंहसँग भेट गरी यस्तो माग गरेको हो। यसैगरी राप्रपाले चैत १५ गते तिनकुने र आसपासका क्षेत्रमा भएको घटनामा दमनमा नेतृत्व गर्ने प्रहरी प्रमुख र प्रशासनिक नेतृत्वलाई निलम्बन गर्न माग गरेको छ।
अध्यक्ष राजेन्द्र लिङ्देनको नेतृत्वमा गएको राप्रपाको प्रतिनिधिमण्डलले बिहीबार कार्यवाहक प्रधानमन्त्री सिंहसँग भेट गरी चैत १५ गते तिनकुने र आसपासका क्षेत्रमा भएको घटनालगायतका विषयमा सरकारलाई पाँचबुदे ज्ञापन पत्र पेस गरेको हो।
राप्रपाले सर्वोच्च अदालतका पूर्वन्यायाधीशको अध्यक्षतामा मानवअधिकार आयोग, नागरिक समाज सम्मिलित स्वतन्त्र छानबिन आयोगको गठनको माग गरेको छ। यसैगरी पार्टी उक्त घटनाका छानबिनका लागि गृहमन्त्रीको राजीनामा माग गरेको छ भने दमनमा नेतृत्व गर्ने प्रहरी प्रमुख र प्रशासनिक नेतृत्वको निलम्बनको माग गरेको छ।
राप्रपाले मृतकहरू सविन महर्जन र सुरेश रजकलाई सहिद घोषणा तथा क्षतिपूर्तिको व्यवस्था गर्न माग गरेको छ।
यसैगरी राप्रपा नेताहरू रवीन्द्र मिश्र र डा. धवलशमशेर राणालगायत अन्यमाथिको झुठा मुद्दा खारेजी र निर्दोषहरूको रिहाइको माग राप्रपाले गरेको छ। राप्रपाले उक्त घटनामा घाइतेहरूको निःशुल्क र प्रभावकारी उपचारको व्यवस्था गर्न सरकारसँग माग गरेको छ।
राजसंस्था पुनर्स्थापनाका लागि संयुक्त जनआन्दोलन समितिले १५ गते तीनकुनेमा आयोजना गरेको सरकारी विरोधी प्रदर्शनमा एक पत्रकारसहित दुई जनाको मृत्यु भएको थियो। प्रदर्शनकारीले सरकारी कार्यालय, जडिबुटी प्रशोधन केन्द्रको भवन र नेकपा एकीकृत समाजवादीको कार्यालयमा आजगनी गरेको थियो।
यसैगरी कोटेश्वरस्थित भाटभटेनी सुपरस्टोरमा लुटपाट मच्चाएका थिए। उक्त घटनामा संलग्न भएको आरोपमा राप्रपाका वरिष्ठ नेता रवीन्द्र मिश्र र महामन्त्री धवलशमशेर राणा प्रहरी हिरासतमा रहेका छन्।
