हिमाल प्रेस 
काठमाडौँ– नेपाल प्रहरीले शुक्रबार तीनकुनेमा प्रदर्शनकारी हिंसात्मक रुपमा प्रस्तुत भएपछि गोली चलाउनुपरेको जनाएको छ।
बुधबार काठमाडौँमा पत्रकार सम्मेलन गर्दै प्रहरीले उत्तेजित भिड हिंसात्मक रुपमा प्रस्तुत भएपछि नियन्त्रणमा लिन गोली चलाउनुपरेको जनाएको हो।
नेपाल प्रहरीका केन्द्रीय प्रवक्ता डीआईजी दिनेश आचार्यले अराजक भिडलाई नियन्त्रणमा लिन गोली चलाउनुपरेको बताए।
प्रदर्शनकारीहरु बिमानस्थलतर्फ अघि बढेपछि शुक्रबार दिउँसो २ बजेर ५४ मिनेटमा प्रहरीले पहिलो गोली प्रहार गरेको उनले बताए। तीनकुने घटनामा २ महिला र १८ पुरुष गरि २० जनालाई गोली लागेको आचार्यले जानकारी दिए।
आचार्यले आन्दोलनका क्रममा जम्मा ५८ राउन्ड गोली प्रहार भएको, ७४६ राउन्ड अश्रू ग्यास र १९२ पटक ब्ल्यांक फायर भएको उल्लेख गरे। प्रवक्ता आचार्यले तीनकुनेमा भेला भएका प्रदर्शनकारीहरु निषेधित क्षेत्र तोड्दै संसद भवन तर्फ अघि बढ्न खोजेपछि त्यसलाई नियन्त्रणमा लिन प्रहरीले शुक्रबार १२ बजेर ५० मिनेटमा पहिलो अश्रूग्यास प्रहार गरेको बताए।
त्यसपछि दुर्गा प्रसाईँ नेतृत्वको भीड तीनकुनेबाट जबरजस्ती अघि बढेपछि प्रदर्शनकारी थप उत्तेजित भएको उनले जानकारी दिए। प्रहरीले निषेधित क्षेत्रबाट हटाएपछि तीनकुनेको मञ्चबाट दुर्गा प्रसाईँ र रवीन्द्र मिश्रले संसद भवन, सिंहदरबार र विमानस्थल कब्जा गर्न माइकिङ गर्दै निर्देशन दिएको र प्रदर्शनकारी तोडफोडमा उत्रिएको प्रवक्ता आचार्यले बताए।
तीनकुनेमा तोडफोड र आगलागी भएको घरमा जान नसकेपछि प्रहरीले पानीको फोहरा प्रहार गरेको र दमकल जान खोज्दा ढुङ्गामुडा समेत भएको प्रहरीले जनाएको छ। प्रवक्ता आचार्यले उक्त घटनापछि फरार रहेका दुर्गा प्रसाईको खोजी कार्य जारी रहेको र हिंसात्मक गतिविधिमा संलग्नको पहिचान गरी नियन्त्रणमा लिइएको जानकारी दिए। प्रदर्शनमा प्रहरीले अनावश्यक बल प्रयोग गर्यो भन्ने कुरामा कुनै सत्यता नरहेको र भयावह अवस्थालाई नियन्त्रणमा लिन बल प्रयोग गरेको उनको भनाइ छ।
