गणतन्त्रवादीसँग जुधेर ज्ञानेन्द्र नांगेझार भएका छन् : प्रचण्ड

काठमाडौँ– नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले राजसंस्था पुनःस्थापनाको सपना देखेर पूर्वराजा ज्ञानेन्द्र शाह नांगेझार भएको बताएका छन्। नेपालगन्जमा बुधबार अखिल नेपाल महिला संघ क्रान्तिकारी लुम्बिनी प्रदेशको दोस्रो सम्मेलनको उद्घाटन कार्यक्रमलाई सम्बोधन गर्दै उनले यस्तो बताएका हुन्।

‘दुर्गा प्रसाईँजस्तो हावा मान्छेलाई कमान्डर बनाएका छन्, त्यस्तालाई बनाउन हुन्छ कमान्डर? ज्ञानेन्द्रको बुद्धिलाई के भन्नु नाङ्गेझार भएका छन्। दुर्गा प्रसाईँ होइन, ज्ञानेन्द्र नाङ्गेझार भएका हुन्,’ प्रचण्डले भने,‘मुर्ति चोरी गर्ने, सर्वसाधारणको हत्या गर्ने, अनि उनीहरू जनतासँग लड्ने, जनताले ल्याएको गणतन्त्रसँग लड्ने रे? विदेशीले पठाइदिएको पैसाको भरमा वितण्डा मच्चाउने रे?’

सरकारका गलत क्रियाकलापका कारण विगतमा मिल्काइएका शक्तिहरूले टाउको उठाउने दुस्साहस गरेको उनको भनाइ थियो। उनले आफूहरू मधेश केन्द्रित अभियानमा रहेको मौका छोपी राजावादीहरू गणतन्त्रमाथि धावा बोल्ने कोसिस गरेको जिकिर गरे।

अहिले सरकारको नेतृत्व गरिरहेका नेता पनि विगतमा गणतन्त्रको पक्षमा नरहेको बताउँदै प्रचण्डले गणतन्त्र र संघीयताको रक्षा गर्ने दायित्व माओवादी केन्द्रमाथि रहेको उल्लेख गरे।

हजारौँ जनताको बलिदानीपछि प्राप्त गणतन्त्र र संघीयता केही मान्छेले हल्ला गरेकै भरमा अन्त्य नहुने उनले दाबी गरे।

पूर्वप्रधानमन्त्रीसमेत रहेका प्रचण्डले जनताको अधिकार सुरक्षित हुने गरी संविधान संशोधन गर्न सरकारलाई सुझाव दिएका छन्। कांग्रेस र एमालेसँग संविधान संशोधन गर्ने ल्याकत नभएको दाबी गर्दै उनले जनताको अधिकारविरूद्ध संविधान संशोधन गरिए जेहाद छेड्ने बताए।

‘कांग्रेस र एमालेसँग संविधान संशोधन गर्ने ल्याकत छैन। यद्यपि संविधान संशोधन गर्ने भनेरै उनीहरू एक ठाउँमा आएका हुन्,’ प्रचण्डले भने,‘जनताको अधिकारविरूद्ध संविधान संशोधन गरिए हामीले जेहाद छेड्छौँ। प्रत्यक्ष निर्वाचित राष्ट्रपतिमात्र विकल्प हो। जनसंख्याको आधारमा पूर्ण समानुपातिक हुने गरी प्रत्यक्ष निर्वाचन प्रणालीलाई पनि स्वीकार गर्न सकिन्छ।’

विगतमा आफूबाट धेरै गल्ती भएको स्वीकार गर्दै प्रचण्डले ती गल्तीहरूलाई सुधार गरेर अगाडि बढिरहेको बताए। उनले भने,‘विगत आठ दस वर्षमा धुलोमैलो लागेकै हो, त्यो पखाल्ने जनता नै हो, कार्यकर्ता नै हो। विगतमा भएका गल्ती सुधारेर अगाडि बढ्ने जमर्को गरेका छौँ।’

प्रचण्डले कांग्रेस–एमालेको वैशाखी टेकेर नभइ माओवादी एक्लै चुनावमा गएर बहुमत ल्याउने दाबी गरे।