प्रमुख सचेतकहरूले भने- संसद्को हिउँदे अधिवेशन उपलब्धिपूर्ण

काठमाडौँ- संघीय संसद्को हिउँदे अधिवेशन कानुन निर्माण र जनताको आवाज उठाउने सन्दर्भमा उपलब्धिपूर्ण भएको सत्ता र प्रतिपक्ष दुवै पक्षको दाबी छ।

नेकपा एमालेका प्रमुख सचेतक महेश बर्तौलाका अनुसार यो अधिवेशन कानुन निर्माणका हिसाबले प्रभावकारी रह्यो। ११ विधेयक पारित भए। पारित विधेयकमध्ये  १० वटा दुवै सदनबाट अनुमोदन भएको उनले बताए। संघीय निजामती र विद्यालय शिक्षा विधेयक बजेट अधिवेशनमा पारित गरिने उनको भनाइ छ।

कांग्रेसका प्रमुख सचेतक श्यामकुमार घिमिरेले विधेयक निर्माण अपेक्षित रूपमा नभएकाले प्रक्रिया द्रुत बनाउन समयसीमा तोक्नुपर्ने बताए। केही विधेयक समितिमा अड्किएको र मन्त्रीहरू पर्याप्त सहयोगी नभएको उनको भनाइ छ।

माओवादी केन्द्रका प्रमुख सचेतक हितराज पाण्डेका अनुसार सरकारले अध्यादेश र प्रतिस्थापन विधेयकमै ध्यान दिएको र प्रतिपक्षको दबाबकै कारण सदनलाई उत्तरदायी बनाउन सकिएको हो।

संसद्मा भएका विधेयक छिटो टुंग्याउने आवश्यकता छ भने सरकारले संसद्प्रति बढी जिम्मेवार हुनुपर्ने विपक्षी दलहरूको माग छ।