हिमाल प्रेस 
प्रतिनिधिसभा, राज्य व्यवस्था तथा सुशासन समितिको बुधबार सिंहदरबारमा बसेको बैठक। तस्बिर : रासस
काठमाडौँ- प्रतिनिधिसभाअन्तर्गतको राज्य व्यवस्था समितिले चैत १५ गते भएको घटनाका विषयमा सरकारको जवाफ माग गर्ने निर्णय गरेको छ। सिंहदरबारमा बुधबार बसेको बैठकमा समिति सदस्यहरुले राजावादीको प्रदर्शनका भएको घटनाका विषयमा गृहमन्त्रीले जवाफ दिनुपर्ने माग गरेपछि समितिले चैत २२ गते शुक्रबारको बैठकमा गृहमन्त्रीलाई बोलाउने निर्णय गरेको हो।
बैठकमा सांसदहरूले चैत १५ गते शुक्रबार भएको घटनाका बारेमा सरकारले स्पष्ट पार्नुपर्ने बताएका थिए। साथै उनीहरुले उक्त घटनाको न्यायिक छानबिनको समेत माग गरेका छन्।
कांग्रेस सांसद विश्वप्रकाश शर्माले तीनकुने घटना छानबिनका लागि सरकारले न्यायिक समिति बनाउनुपर्ने बताए। उनले तीनकुने घटनामा सरकारको बुझाइ समितिसमक्ष आउनुपर्ने पनि बताए।
माओवादी केन्द्रका प्रमुख सचेतक हितराज पाण्डेले तीनकुने घटनामा सरकारको कमजोरी देखिएको भन्दै गृहमन्त्रीले जवाफ दिनुपर्ने बताए। आफ्नै प्रहरीले घेरामा रहेका बेलामा दुर्गा प्रसाईंलाई समात्न नसक्ने र अहिले छिटो पक्राउ गर्छौँ भन्दा कसैले पत्याउन नसक्ने उनले बताए।
राप्रपाका सांसद बुद्धिमान तामाङले १५ गतेको घटनामा एकपक्षीय रुपमा राजावादीप्रति खनिएको भन्दै निष्पक्ष न्यायिक छानबिन हुनुपर्ने बताए। राप्रपाका नेताहरूसमेत उक्त प्रदर्शनमा जाने तयारी गरे पनि दुर्गा प्रसाईंको फोटो देखेपछि नगएको तामाङको भनाइ थियो।
सांसद तामाङले आफ्ना नेताहरुलाई समेत भएभरका कानुन लगाएर थुन्ने काम भएको जिकिर गरे।
राजतन्त्र पुनस्र्थापनाका लागि संयुक्त जनआन्दोलन समितिले गरेको प्रदर्शन हिंसात्मक बन्दा दुई जनाको ज्यान गएको थियो। प्रदर्शनका क्रममा आगजनी र लुटपाटका घटना पनि भएका थिए।
