हिमाल प्रेस 
मेडिकल राहत सामग्रीसहित मित्रराष्ट्र म्यानमार प्रस्थान गरेको नेपाली सेनाको टोली। तस्बिर स्रोत : नेपाली सेना
काठमाडौँ- मेडिकल राहत सामग्रीसहित नेपाली सेनाको टोली मित्रराष्ट्र म्यानमार प्रस्थान गरेको छ।
म्यानमारमा हालै गएको विनाशकारी भूकम्पका कारण भएको व्यापक धनजनको क्षतिपछि नेपाल सरकारको निर्णयबमोजिम सेनाको टोली राहत सामग्री लिएर बुधबार त्यसतर्फ गएको हो।
प्रमुख सेनानी रामचन्द्र श्रेष्ठको नेतृत्वमा १२ जना चिकित्सकीय टिम, ४ जना बन्दोबस्ती सहायता टिम र ६ जना क्रु मेम्बरसहित कुल २२ सदस्यीय टोली नेपाली सेनाको विमानद्वारा म्यानमार तर्फ प्रस्थान गरेको हो।
विभिन्न प्रकृतिका आवश्यक औषधि उपकरणसहित उक्त टोलीमा सर्जन, अर्थोपेडिक, मेडिसिन चिकित्सक, नर्स तथा प्यारामेडिकहरु संलग्न छन्। उक्त टोलीले करिब एक साता म्यानमार भूकम्पमा परी घाइते भएकाहरूको स्वास्थ्य उपचारमा खटिई सेवा प्रदान गर्नेछ।
गत शुक्रबार गएको भूकम्पमा परी २७ सयभन्दा बढीको ज्यान लिएको समाचार एजेन्सी एपीले जनाएको छ।
म्यानमारको सैन्य सरकारका प्रमुख वरिष्ठ जनरल मिन आङ हलाइङका अनुसार हालसम्म २७ सय १९ जनाको मृत्यु पुष्टि भइसकेको छ। भूकम्पमा परेर ४५ सय २१ जना घाइते भएका छन्। साथै चार सय ४१ जना हराइरहेका छन्। शुक्रबारको भूकम्प म्यानमारको इतिहासमा दोस्रो सबैभन्दा शक्तिशाली थियो। यसअघि मे १९१२ मा म्यान्डलेको पूर्वी क्षेत्रमा ८ म्याग्निच्युडको भूकम्प गएको थियो।
मृत्यु तथा क्षतिको संख्या अझै बढ्ने अनुमान गरिएको छ। भूकम्पले देशको ठूलो भागलाई प्रभावित बनाएको छ, जसका कारण धेरै क्षेत्रमा विद्युत्, टेलिफोन र मोबाइल सञ्जाल अवरुद्ध भएका छन्। सडक तथा पुलहरूमा क्षति पुगेकाले विनाशको पूर्ण अवस्था निर्धारण गर्न कठिन भइरहेको छ।
