हिमाल प्रेस 
काठमाडौँ- यही चैत्र २२ देखि प्रदर्शन हुने फिल्म ‘वसन्त’ को टिकट बुकिङ खुलाइएको छ। मंगलबारदेखि नै क्युएफएक्स सिनेमाजले फिल्मको बुकिङ खुलाएको हो।
अन्य मल्टीप्लेक्सदेखि सिंगल हलमा पनि फिल्मको सो खुलाइएको छ। ठूलो मल्टीप्लेक्स चेन क्युएफएक्स सिनेमाजले उपत्यकामा ३३ सो र उपत्यकाबाहिर ३९ गरी देशैभर ७२ सो दिएको छ।
आइएनआइ सिनेमाजले लोत्से मल, एनबी सेन्टर, क्युबक्स बुटवल र सिमरा बिजनेस सेन्टरको हलमा गरी १६ सो दिएको छ। वान सिनेमाजले आइप्लेक्स र कालीमाटी ट्रेड सेन्टरमा १० सो दिएको छ।
त्यस्तै एफक्युबले ५, बिएसआर सिनेमाजले ४ सो दिएको छ। अन्य हल बिग मुभिज, रञ्जना सिनेप्लेक्सलगायत हलले सो खुलाएको छैन्। प्रकाश सपुतको डेब्यु निर्देशनमा बनेको फिल्म नेपाल र विदेशमा एकैदिन प्रदर्शन हुनेछ।
फिल्ममा प्रकाश सपुत, स्वस्तिमा खड्का, प्रभात पाल ठकुरी, श्री शिभान्सी, उर्मिला लाम्गादे र खड्क बहादुर पुन (खबपु), अनुप बराल, कमलमणि नेपाल, प्रकाश घिमिरे, विशाल पहारीलगायतको अभिनय छ।
गलबन्दी प्रोडक्सनको प्रस्तुति रहेको फिल्म सामाजिक कथामा आधारित छ। फिल्मको कथा, पटकथा र संगीत निर्देशक सपुतले नै तयार पारेका हुन्। फिल्ममा विपन्न विश्वकर्मा समुदायको छोराको लेखक बन्ने सपना र लक्ष्य हासिल गर्न उसले गर्ने संघर्षको कथा प्रस्तुत गरिएको छ।
फिल्म गायक तथा निर्देशक सपुतको जन्मथलो बागलुङ, काठमाडौँ र तराईका विभिन्न ठाउँमा छायांकन गरिएको छ। फिल्मको निर्मातामा मोहन विश्वकर्मा र बिन्दु बोहोरा छन्।
