हिमाल प्रेस 
अमेरिकी सिनेटर कोरी बुकर। फाइल तस्बिर : एएफपी/रासस
काठमाडौँ- मञ्च पाएपछि कुन नेतालाई भाषण गरिरहन मन नलाग्ला र? विपक्षीको आलोचना गर्नु र आफूले गरेको कामको प्रंशसा गर्नु नेताहरूको विशेषता नै हो। अनि यसरी श्रोतादर्शक दिक्क हुने गरी भाषण गर्दा पनि नेताहरू थाक्दैनन्।
लामो र चर्का भाषण गरेको भनेर बेलाबेलामा हाम्रै देशका नेताहरूको पनि आलोचना हुने गर्छ। अझ त्यसमा प्रधानमन्त्री एवम् नेकपा एमालेका अध्यक्ष केपी शर्मा ओली निकै अगाडि छन्। उनी उखानटुक्का प्रयोग गर्छन्। अनेक सन्दर्भ ल्याउँछन् र भाषण लम्ब्याइरहन्छन्।
प्रतिपक्षी नेता रहेका बेला ओलीले आव २०८०/८१ को बजेट बारेको छलफलमा भाग लिँदा करिब दुई घण्टा लामो टिप्पणी गरेका थिए। सार्वजनिक कार्यक्रममा सम्भवतः उनको त्यो सबैभन्दा लामो भाषण थियो। त्यति बेला उनको भाषण सुन्दा सांसद नै निदाएको चर्चा भएको थियो।
यहाँ पनि यस्तै लामो भाषणको चर्चा गर्न लागिएको हो। त्यो भाषण दुई घण्टा, चार घण्टा वा आठ घण्टाको होइन, निरन्तर एकै पटक २४ घण्टाभन्दा बढीको हो।
भाषण गरेका हुन् अमेरिकी सिनेटर कोरी बुकरले। उनले सबैभन्दा लामो भाषणको कीर्तिमान तोडेको अमेरिकी समाचार संस्था सीएनएनले जनाएको छ। समाचारमा उल्लेख छ, ‘बुकरले २५ घण्टा ४ मिनेटसम्म निरन्तर बोलेर सिनेटको इतिहासमा सबैभन्दा लामो भाषण दिने कीर्तिमान तोडेका छन्।’
बीबीसीका अनुसार यसअघि १९५७ मा रिपब्लिकन सिनेटर स्ट्रोम थरमन्डले नागरिक अधिकार ऐनको विरोध गर्दै २४ घण्टा १८ मिनेट लामो भाषण गरेका थिए।
डेमोक्र्याट बुकरले आफ्नो लामो भाषणका क्रममा ट्रम्प प्रशासनको आलोचना गरे। उनले यसलाई अमेरिकाको इतिहासमा एक ‘गम्भीर र आपत्कालीन’ क्षण भएको बताए।
स्थानीय समयअनुसार मंगलबार साँझ करिब ७ बजे भाषण थाल्दै बुकरले भने, ‘म अमेरिकी सिनेटको सामान्य कारबाही रोक्न उभिन चाहन्छु, जबसम्म म शारीरिक रूपमा सक्षम रहनेछु।’ उनले देश अहिले गम्भीर संकटमा रहेको बताए।
यद्यपि बुकरको भाषण कुनै विधेयक रोक्ने उद्देश्यले गरिएको थिएन तर यसले मंगलबार सिनेटको विधायिकी कार्यमा अवरोध पुऱ्याएको समाचारमा उल्लेख छ।
५५ वर्षीय बुकर सिनेटमा डेमोक्र्याट पार्टीका चौथो वरिष्ठ सदस्य हुन्। उनले भाषणका क्रममा आफ्ना मतदाताका पत्रहरू पढे, जसमा ट्रम्प प्रशासनका नीतिहरूले उनीहरूलाई कसरी असर पारेको थियो भन्ने उल्लेख थियो।
बुकरले खेलकुदका विषयमा कुराकानी गरे, कविता वाचन गरे र आफ्ना सहकर्मीहरूको प्रश्नको जवाफ दिँदै समय कटाएका थिए।
कीर्तिमान तोड्नुअघि उनले ठट्टा गर्दै भने, ‘मलाई बोल्न सबैभन्दा बढी मन पर्छ। म केही समय अझै जारी राख्नेछु, त्यसपछि मैले केही जैविक आवश्यकताहरू पूरा गर्नुपर्नेछ।’ सिनेटमा बोल्दा उभिनैपर्ने हुन्छ। शौचालय जान अनुमति दिइँदैन।
सिनेटर बुकरले आफ्नो भाषणका क्रममा आफू दास तथा दास मालिक दुवैका सन्तान भएको प्रसंग पनि उल्लेख गरे।
सन् १९५७ मा नागरिक अधिकार ऐनको विरोध गर्दै लामो भाषण दिने विभाजनकारी नेतासँग तुलना गर्दै बुकरले भने, ‘म यहाँ उभिएको छु, किनकि उनी जति शक्तिशाली भए पनि जनता अझ शक्तिशाली छन्।’
