हिमाल प्रेस 
तस्बिर : एपी/रासस
काठमाडौँ- उद्धारकर्मीहरूले म्यानमारको राजधानीमा भत्किएको भवनको भग्नावशेषबाट मंगलबार ६३ वर्षीया महिलालाई जीवितै उद्धार गरेका छन्। २७ सयभन्दा बढीको ज्यान लिएको विनाशकारी भूकम्पपछि थप जीवित भेटिने आशा मर्दै गएको समाचार एजेन्सी एपीले जनाएको छ।
नायप्यिडको दमकल विभागका अनुसार ती महिला शुक्रबार दिउँसो आएको ७.७ रेक्टर स्केलको भूकम्पका कारण भवन भत्किँदा भग्नावशेषमा पुरिएकी थिइन्। उनको ९१ घण्टापछि सफलतापूर्वक उद्धार गरिएको हो।
विज्ञहरूका अनुसार ७२ घण्टापछि जीवित उद्धार हुने सम्भावना निकै कम हुन्छ। भूकम्पले देशमा जारी गृहयुद्धका कारण उत्पन्न मानवीय संकट चुलिएको छ।
म्यानमारको सैन्य सरकारका प्रमुख वरिष्ठ जनरल मिन आङ हलाइङका अनुसार हालसम्म २७ सय १९ जनाको मृत्यु पुष्टि भइसकेको छ। भूकम्पमा परेर ४५ सय २१ जना घाइते भएका छन्। साथै चार सय ४१ जना हराइरहेका छन्। शुक्रबारको भूकम्प म्यानमारको इतिहासमा दोस्रो सबैभन्दा शक्तिशाली थियो। यसअघि मे १९१२ मा म्यान्डलेको पूर्वी क्षेत्रमा ८ म्याग्निच्युडको भूकम्प गएको थियो।
मृत्यु तथा क्षतिको संख्या अझै बढ्ने अनुमान गरिएको छ। भूकम्पले देशको ठूलो भागलाई प्रभावित बनाएको छ, जसका कारण धेरै क्षेत्रमा विद्युत्, टेलिफोन र मोबाइल सञ्जाल अवरुद्ध भएका छन्। सडक तथा पुलहरूमा क्षति पुगेकाले विनाशको पूर्ण अवस्था निर्धारण गर्न कठिन भइरहेको छ।
